पोखरा, थाइल्याण्डको बैंककमा सम्पन्न अन्तराष्ट्रिय स्क्र्याबल प्रतियोगितामा नेपालको तर्फबाट सहभागी भएका पोखराका बालक अनिमेष लामिछानेले आंफुले खेलेका ३१ खेलमध्ये १३ खेल जितेको र १ खेलमा बराबरीको स्थानमा पुग्न सफल भएको छन। प्रतियोगिता यहि मे महिनाको २९ देखि जुन  १ सम्म अर्थात जेठ १५ देखि १८ सम्म भएको हो।

प्रतियोगितामा उनको प्रेरणादायी खेल भावना, लगनशीलता, निरन्तर प्रयास र उत्कृष्ट सहभागिताका कारण प्रतियोगिताको ‘मस्ट इन्स्पाईरिंग प्लेयर’ उपाधि प्रदान गरिएको थियो। कडा प्रतिस्पर्धाबीच प्राप्त उक्त नतिजाले उनको क्षमता, दृढता र खेलप्रतिको समर्पणलाई उजागर गरेको छ।

लामिछानेले आफ्नै उमेर समूहदेखि ७० वर्षसम्मका विभिन्न उमेर समूहका खेलाडीहरूसँग प्रतिस्पर्धा गर्ने दुर्लभ अवसर पाएको उनका बुवा खिम लामिछानेले गुरुकुल खबरलाई जानकारी दिए ।

बिभिन्न ३० देशका प्रतियोगी खेलाडीहरुसँग खेल्दै उनले अन्तर्राष्ट्रियस्तरको महत्वपूर्ण अनुभव, नयाँ सिकाइ तथा विभिन्न संस्कृति र पुस्ताका खेलाडीहरूसँग अन्तरक्रिया गर्ने अवसर प्राप्त गरेको उनले बताए ।  यो उपलब्धिले केवल अनिमेषको व्यक्तिगत सफलतालाई मात्र होइन, अन्तर्राष्ट्रिय मञ्चमा नेपालको उपस्थितिलाई समेत गौरवान्वित बनाएको छ।

सम्बन्धित समाचार ..

अन्तराष्ट्रिय स्क्राबल प्रतियोगितामा भाग लिने अनिमेषलाई बिधालयको तर्फबाट शुभकामना र बिदाई

६० पटक हड्डी भाँचिएका अनिमेषको आत्मबल र इच्छाशक्ति निकै बलियो, एसईईमा ३.३७ जीपीए ल्याउन सफल