पोखरा, पोखराबाट करोडौं रुपियाँ मूल्य पर्ने अबैध सुनसहित एक जना भारतीय नागरिक पक्राउ परेका छन्। स्रोत नखुलेको ६ केजी ६९ ग्राम सुनसहित भारतीय नागरिक सुरजित भौमिक मंगलबार पोखरा-२ मोहोरियान टोलबाट पक्राउ परेका हुन् ।
मोहोरियाटोलस्थित कवीन्द्रप्रसाद श्रेष्ठको घरमा वर्षौंदेखि कोठा भाडामा लिई अबैध रुपमा सुनको कारोबार गरिरहेका उनको साथबाट उक्त परिमाणको सुनसहित ६ किलोग्राम चाँदी र नगद ६२ लाख ८१ हजार रूपैयाँ प्रहरीले बरामद भएको जिउल्ला प्रहरी कार्यालय कास्कीका प्रमुख एसपी मोहनकुमार थापाले जानकारी दिए।
उक्त पसलमा अवैध रूपमा सुन तथा चाँदीका सामान तयार गरी बिक्री वितरण भइरहेको भन्ने सूचनाका आधारमा जिल्ला प्रहरी कार्यालय कास्कीका प्रहरी नायव उपरीक्षक सुनिल मल्लको कमान्डमा खटिएको विशेष प्रहरी टोलीले सुरजितलाई पक्राउ गरेको थियो ।
भारतको पश्चिम बंगालस्थित मेदिनीपुर दासपुर-११ घर भएका ४० वर्षीय सुरजितले ३ तले घर भाडामा लिई विभिन्न किसिमका गरगहना तयार गरी बिक्री वितरण गर्ने गरेको कास्की प्रहरी प्रमुख एसपी मोहनकुमार थापाले बताए । ‘विभिन्न स्थानबाट निजको पसल तथा निजको कोठाभित्र लुकाइछिपाइ राखेको स्रोत खुलाउन नसकेको सुनका गरगहना तथा काँचो सुन र चाँदी बरामद भएको हो,’ उनले भने ।
सुरजितलाई आवश्यक कानुनी कारबाहीका लागि बुधबार राजस्व अनुसन्धान विभाग ललितपुर पठाउने उनले जानकारी दिए । उनका अनुसार सुरजितले लामो समयदेखि घरभाडामा लिएर सुन चाँदीको गरगहना बेचबिखन गर्दै आएका थिए । उनको साथबाट भारतको आधार कार्ड, विभिन्न बैंकका १३ थान चेकसमेत बरामद भएको छ ।
