पोखरा, स्याङ्जाको वालिङ नगरपालिका वडा नम्बर – ५ जगत भञ्ज्याङमा पर्ने वालिङ-चापाकोट भित्री पक्की सडक खण्डमा गुडिरहेको एक स्कुटरमा आगलागी भएको छ। ग १६ प ६१४५ नम्बरको टिभिएस कम्पनीको एन्टरक १२५ सिसीको स्कुटरमा मंगलबार साँझ आगलागी हुँदा स्कुटर पूर्ण रुपमा क्षति भएको छ।
चापाकोट नगरपालिका वडा नम्बर ९ बस्ने अन्दाजी २१ वर्षका मन्दिप विकले चलाएको उक्त स्कुटरमा साँझ अन्दाजी पौने ६ बजेको समयमा गुडिरहेकै अवस्थामा अचानक आगो सल्किएको थियो। घटनामा कुनै मानवीय क्षति भने नभएको प्रहरीले जनाएको छ। सडकमा गुडिरहेका बेला एकाएक आगो सल्किएपछि चालकले ओर्लिएर ज्यान जोगाएका थिए।
‘गुडिरहेको स्कुटरमा अचानक आगलागी भएको जानकारी आएपछि प्रहरी टोली खटाइएको हो, मानवीय क्षति नभए पनि स्कुटर पूर्ण रूपमा क्षति भएको छ,’ जिल्ला प्रहरी कार्यालय स्याङ्जाका सूचना अधिकारी प्रहरी नायव उपरीक्षक रमेश दत्त अवस्थीले भने।
