पोखरा, ६० किलो सुन काण्डको छानविन गर्न सीआईबीले आफ्ना एक एसएसपीलाई हङकङ पठाउने भएको छ । त्रिभुवन अन्तर्राष्ट्रिय विमानस्थलबाट बरामद गरिएको उक्त सुनबारे अनुसन्धान गर्न केन्द्रीय अनुसन्धान ब्युरो (सीआईबी)ले प्रहरी वरिष्ठ उपरीक्षक दिनेश आचार्यलाई हङकङ पठाउन लागिएको सीआईबीका एक जना अधिकृतले बताए।
हङकङबाटै तस्करी गरेर ल्याइएको ६० किलो ७ सय १६ ग्राम सुन राजस्व अनुसन्धान विभागले साउन ३ मा बरामद गरेको थियो । सुनकाण्डको अनुसन्धान गरिरहेको विभागले अनुसन्धानको जिम्मेवारी साउन २१ मा सीआईबीलाई प्रदान गरेको थियो ।
प्रहरी वरिष्ठ उपरीक्षक आचार्य इन्टरपोल हङकङसँगको समन्वयमा हङकङ जान लागेका हुन् । तस्करीबारे अनुसन्धान गर्न प्रहरी प्रधान कार्यालयले एआईजी किरण बज्राचार्यको नेतृत्वमा समिति पनि बनाएको छ । बज्राचार्य सिआईबीकी निर्देशकको जिम्मेवारीमा छन् ।
सीआईबीले एसपी सञ्जयसिंह थापाको कमान्डमा टिम बनाएर साउन २२ देखी अनुसन्धान सुरु गरेको थियो । अनुसन्धानका लागि प्रहरीले इन्टरपोलको सहयोग माग्दै यसअघि नै पत्र पठाएको थियो । सुन ‘रेडी ट्रेड प्रालि’ले मोटरसाइकल र स्कुटरको ‘ब्रेक प्याड’मा लुकाएर काठमाडौं सम्म तस्करी गरेको थियो ।
