पोखरा, सोमबार र मंगलबार गरि दुई दिनको अबधिमा सुनको मुल्यमा १८ हजार रुपैया भन्दा बढी घटेको छ । सोमबार १५ हजार ९ सय रुपैयाले घटेको सुनको मुल्य मंगलबार थप २ हजार ६ सयले घटेको छ । जसका कारण दुई दिनको अबधिमा नेपालमा सुनको मुल्यमा प्रति तोला १८ हजार ३ सयले कमि आएको हो।

सुनचाँदी व्यवसायी महासंघका अनुसार सोमबारको तुलनामा छापावाल सुन तोलामा २ हजार ६०० रुपैयाँले घटेको हो। मंगलबार सुनको मूल्य तोलामा १ लाख ४८ हजार ७०० रुपैयाँ कायम भएको छ ।

यसअघि भन्सार दर घटाइएसँगै सोमबार नेपाली बजारमा सुनको मूल्यमा भारी गिरावट आएको थियो । जुन दिन सुनको मूल्य तोलामा १५ हजार ९०० रुपैयाँ घटेर १ लाख ५१ हजार ३०० रुपैयाँ कायम भएको थियो । जबकि आइतबार छापावाल सुनको मूल्य १ लाख ६७ हजार २०० रुपैयाँ कायम भएको थियो ।

मन्त्रिपरिषद्को मंसिर ६ गते बसेको बैठकको निर्णय अनुसार सुन र चाँदीको भन्सार दर १० प्रतिशत कायम गर्ने निर्णय भएकोमा उक्त भन्सार दर सोमबारदेखि कार्यान्वयनमा आएको थियो ।

यसैबिच सोमबार चाँदीको मूल्य तोलामा १ हजार ८४५ रुपैयाँ कायम भएकोमा मंगलबार घटेर १ हजार ८२० रुपैयाँ कायम भएको छ।