पोखरा, गण्डकी प्रदेशको प्रेस रजिष्ट्रारमा नियुक्त विमला भण्डारीले पद बहाली गरेकी छन । शुक्रबार बसेको मन्त्रिपरिषद् बैठकले नेपाल पत्रकार महासंघ कास्की अध्यक्ष भण्डारीलाई रजिस्ट्रार नियुक्त गरेको थियो । सोमबार उनलाई गण्डकी प्रदेशका मुख्य मन्त्री सुरेन्द्रराज पाण्डेले पद बहाली गराएका थिए।

गण्डकीको पहिलो प्रेस रजिष्टार नियुक्तिका लागि सरकारले गत १६ साउनमा १५ दिनको म्याद दिएर सार्वजनिक सूचनामार्फत दरखास्त आह्वान गरेकोमा ५ जनाले दरखास्त दिएका थिए ।

छनोट समितिका सदस्यसचिव समेत रहेका मुख्यमन्त्री कार्यालयका सचिव केशवराज ढकालका अनुसार उक्त पदका लागि ५ जनाको दरखास्त परेका थिए । जसमा भण्डारीसहित भरत कोइराला, भानु पराजुली, दुर्गा अधिकारी, सरिता तिम्सिना पगेनी प्रतिस्पर्धी थिए ।

आर्थिक मामिला मन्त्री एवं सरकारका प्रवक्ता डा. टकराज गुरुङको संयोजकत्वमा गठित ३ सदस्यीय छनोट समितिले गरेको सिफारिसको आधारमा भण्डारीलाई नियुक्त गरिएको हो । गण्डकी प्रदेश आमसञ्चार ऐन, २०८० बमोजिम आगामी ४ वर्षका लागि उनि प्रेस रजिष्ट्रार नियुक्ति भएकी हुन ।