पोखरा, कास्कीको माछापुच्छ्रे गाउँपालिका–७ घिप्लेमा सामान्य विवादलाई लिएर भएको कुटपिटका कारण २२ वर्षीय राजेन्द्र पौडेलको ज्यान गएको छ । घरायसी बिबाद बढ्दै गएपछि आंफ्ना छिमेकीहरुको सामुहिक कुटपिटबाट उनको मृत्यु भएको प्रहरीले जनाएको छ । उक्त घटनमा संलग्न रहेको आरोपमा प्रहरीले स्थानीय ५ जना युवालाई नियन्त्रणमा लिएर आबश्यक अनुसन्धान र कारबाहीको प्रक्रिया अगाडी बढाएको जनाएको छ ।
पौडेलमाथि भएको कुटपिट एबम उनको हत्यामा संलग्न भएको आरोपमा प्रहरीले ५ जनालाई पक्राउ गरेको छ । पक्राउ पर्नेहरुमा माछापुच्छ्रे गाउँपालिका ७ का ३० वर्षीय विक्रम पुन, २३ वर्षका आशिष गुरुङ, ३० वर्षका महादेव विक, मिलन विक र ३८ वर्षका लिलबहादुर पुन रहेको छन् । घटनास्थलबाट प्रहरीले घटनामा प्रयोग गरिएका २ थान बाँसको भाटा, १ थान दाउरो, १ थान हँसिया, बियरको बोतलका टुक्राहरू र पानीको बोतल बरामद गरेको छ । पक्राउ परेका पाँचै जनाविरुद्ध कास्की जिल्ला अदालतबाट कर्तव्य ज्यान सम्बन्धी कसूरमा ५ दिनको म्याद थप गरी थप अनुसन्धान प्रक्रिया अगाडि बढाइएको प्रहरीले बताएको छ ।
घटना विवरण अनुसार गत सोमबार बिहान सवा ८ बजे पौडेलको मृत शरीर उनको आफ्नै घरभन्दा करिब ५० मिटर पूर्वतर्फ रहेको बारीमा फेला परेको थियो । नग्न अबस्थामा भेटिएको शरीरको बिभिन्न भागमा निलडाम, घाउचोट देखिएको थियो । घटनाको बारेमा जानकारी पाए लगत्तै प्रहरी चौकी धम्पुस, जिल्ला प्रहरी कार्यालय कास्की, नेपाल प्रहरी प्रदेश कार्यालय पोखरा र वडा प्रहरी कार्यालय बगरबाट खटिएको टोलीले अनुसन्धान प्रक्रिया अगाडी बढाएको थियो।
प्रारम्भिक अनुसन्धानपछि प्रहरीले दिएको विवरण अनुसार अघिल्लो साँझ कात्तिक ८ गते राजेन्द्रले पर्यटकको भारी बोकेर कमाएको पैसाबाट साथीहरूलाई मदिरा र बियर खुवाउने निधो गरेका थिए । त्यसपछि उनले नजिकका छिमेकका साथीहरुलाई बोलाए खानपिन गर्दा पौडेलले नजिकै रहेको मौरीको घारमा लात्तीले हानेपछि उनीहरको बिचमा आन्तरिक बिबाद बढेको बताइन्छ। विवाद बढ्दै गएपछि पौडेलले साथी आशिषको खुट्टामा हँसियाले हानिदिए । अर्का साथी मिलनलाई पनि घाँटीमा प्रहार गरे । त्यतिबेलासम्म झगडा सामान्यजस्तै देखिएको थियो । सबैजना छुट्टिएर आ–आफ्नो घरतिर लागे ।
घर पुगेपछि हँसियाको चोट खाएका आशिषमा बदला लिने सोच आयो, अनि राति १२ बजेतिर उनले सँगै रक्सी पिएर छुट्टिएका विक्रम र लिलबहादुरलाई फोन गरेर बोलाए । अरू २ जना साथीहरूलाई पनि लिएर उनीहरू राजेन्द्रको घरमा पुगे । त्यसपछि उनीहरुले भाटा, मुक्का र लात्तीले हान्दै घाइते बनाए । त्यसपछि उनलाई घिसारेर बारीमा लगेर फालेको प्रारम्भिक अनुसन्धानबाट खुलेको छ । कास्की जिल्ला प्रहरी कार्यालयका सूचना अधिकारी समेत रहेका प्रहरी नायब उपरिक्षक बिरेन्द्र पासवानका अनुसार उक्त घटना योजनाबद्ध रुपमा गरिएको पुष्टी नभएपनि आवेग र उत्तेजनामा आएर कुटपिट गरेको कारण उनको हत्या भएको बताइन्छ।
साथीहरुसँग खानपिनमा बस्नु अघि पौडेलले आफ्नै भिनाजुसँग पनि विवाद गरेको खुल्न आएको सूचना अधिकारी पासवानले बताए । पौडेलले आफ्नो मोवाइल हराएको भन्दै भिनाजुको मोबाइल माग्दा नदिएपछि त्यसको बदलामा भिनाजुको मोबाइल फुटाइदिएका थिए । त्यसपछि उनि हँसिया लिएर निस्किएका प्रहरीको अनुसन्धानबाट खुलेको छ ।
