पोखरा, पोखरा महानगरपालिका १४ विजयबस्तीबाट वडानम्बर २६ सक्नेरी आउन लागेका दुई जना बालकलाई आज शनिबार दिउँसो करिब १ बजे विजयपुर खोलाले बगाएको छ । स्थानीय भगवती हाइड्रोपावर नजिकै खोला तर्दै गरेको अबस्थामा करिब १५ बर्षका दुईजना बालकलाई खोलाले बगाएर बेपत्ता बनाएको हो ।

बेपत्ता भएका मध्ये एकजना स्याङ्जाको बिरुवा गाउँपालिका ७ घर भई हाल पोखरा १४ छिन्नेडाँडा आर्मी पल्ट्रिङमा बस्ने १४ वर्षका निकसन गुरुङ रहेको प्रहरीले जनाएको छ । निक्सनका बुवा चन्द्रबहादुर गुरुङ घटनाको केहि समयपछि प्रहरीको सम्पर्कमा आएपछि उनको पहिचान खुलेको भएपनि अर्को बालकको पहिचान खुल्न सकेको छैन ।

घटनाको बारेमा जानकारी पाएपछि इलाका प्रहरी कार्यालय शिशुवाबाट प्रहरी नायब उपरीक्षक गुणराज बुढाथोकीको कमान्डमा ७ जना र जिल्ला प्रहरी कार्यालय कास्कीबाट प्रहरी निरीक्षक रामजी देवकोटाको नेतृत्वमा ७ जनाको टोली उनीहरुको खोजीमा जुटेको छ । यसैगरी वडा प्रहरी कार्यालय रामबजारबाट प्रहरी निरीक्षक तेजप्रसाद कँडेलको कमान्डमा ७ जनाको टोली र सशस्त्र प्रहरी बलको बेस क्याम्प कुँडहरबाट सशस्त्र प्रहरी निरीक्षक केशव शर्माको नेतृत्वमा ९ जनाको गोताखोर टोली पनि त्यस क्षेत्रमा परिचालन गरिएको छ ।