पोखरा, पत्रकारिताको माध्यमबाट हिमाली क्षेत्र र पर्वतीय पर्यटनको प्रबर्द्दन गरेको भन्दै पोखराका क्रियाशील पत्रकार भुपाल गुरुङलाई नेपाल पर्वतारोहण संघ गण्डकी प्रदेशले आफ्नो १८ औं वार्षिक साधारण सभा तथा ८ औं अधिवेशनका अवसरमा सम्मान गरेको छ शुक्रबार पोखरामा आयोजित एक समारोहमा गुरुङलाई नगदसहित सम्मान गरिएको हो ।
गुरुङले हिमाल, पदयात्रा, पर्वतारोहण र हिमाली जनजीवनका विषयलाई सञ्चारमाध्यममार्फत आम सर्बसाधारण समक्ष पुर्याउन विशेष भूमिका खेलेका छन् । कार्यक्रममा नेपाल पर्वतारोहण संघका केन्द्रीय अध्यक्ष फुरगेल्जे शेर्पा र प्रदेश अध्यक्ष विकास गुरुङले उनलाई नगद, फेटा र सम्मानपत्र प्रदान गरेका थिए । कार्यक्रममा संघका सचिव मनशान्त घिमिरे र पोखरा पर्यटन परिषदका अध्यक्ष तारानाथ पहारी लगायतको उपस्थिति थियो ।
विगत १८ वर्षदेखि पत्रकारितामा सक्रिय गुरुङले विशेषगरी टेलिभिजन पत्रकारितामार्फत गण्डकी प्रदेशका हिमाली क्षेत्र र साहसिक पर्यटनका कथा बाहिर ल्याउने गरेका छन् । सम्मान ग्रहण गर्दै गुरुङले पर्यटन विकासका लागि भौतिक पूर्वाधार जत्तिकै प्रभावकारी सञ्चार पनि आवश्यक रहेको बताए । ‘पर्यटन क्षेत्रका संस्था र सञ्चार जगतबीचको सहकार्य अझ बलियो हुनुपर्छ’, उनले भने ।
आगामी दिनमा पनि हिमाली पर्यटन र संरक्षणका मुद्दालाई प्राथमिकताका साथ उठाउने प्रतिबद्धता जनाउंदै उनले पत्रकारितालको माध्यमबाट साहसिक पर्यटनको प्रबर्द्दनमा ठूलो सहयोग पुगेको बताए । गुरुङ हाल कान्तिपुर टेलिभिजनमा कार्यरत छन ।
