पोखरा, रेडियो अन्नपूर्ण र पोखरा इन्टरनेटको संयुक्त आयोजनामा पोखरा -४ गैरापाटनमा यहि चैत २१ शनिवार बृहत रक्तदान हुने भएको छ । रेडियोको वार्षिक कार्यक्रम तथा सामाजिक उत्तरदायित्व अन्तर्गत यसबर्ष पनि चैतको तेश्रो शनिबार “रक्तदान म पनि गर्छु” भन्ने मूल नाराका साथ २४औं बृहत खुल्ला रक्तदान कार्यक्रम आयोजना गर्ने लागेको रेडियोका स्टेशन म्यानेजर संजयकुमार मल्लले गुरुकुल खबरलाई जानकारी दिए।

चैत महिनामा रक्तदानका कार्यक्रमहरु कम हुने हुँदा रगतको अभाव हुने भएकाले संस्थागत सामाजिक उत्तरदायित्व बहन अन्तर्गत कार्यक्रम गदै आइरहेको कार्यक्रम संयोजक सिता क्षेत्रीले बताइन्। रक्तदान कार्यक्रमलाई सफल बनाउन विभिन्न समितिहरु समेत गठन गरिएको छ । रक्तदान कार्यक्रममा रक्त सञ्चार केन्द्र पोखराको प्राविधिक सहयोग रहनेछ ।

रक्तदान कार्यक्रममा १७ देखी ६० वर्ष उमेर समूहका ४५ केजी भन्दामाथि तौल भएका कुनै पनि दिर्घरोगको औषधी सेवन नगरेका संक्रामक रोग नलागेका स्वस्थ व्यक्तिले रक्तदान गर्न सक्ने छन् । रक्तदान कार्यक्रमको लागि पोखरा फाइनान्स लिमिटेड , प्रभु बैँक लिमिटेड, नेपाल बैंक लिमिटेड, जोन्टा क्लब पोखरा लगायतले सहयोग गरेको छन। रेडियोले गत बर्ष आयोजना गरेको रक्तदानमा १ सय ३० युनिट रगत सङ्कलन गरेको थियो।