पोखरा, कास्कीको पोखरामहानगरपालिका वडा न २५ हेम्जामा यहि चैत २५ गतेदेखि बैशाख ५ गतेसम्म हुने १२ औं संस्करणको राष्ट्रिय हेमजा आलु महोत्सवको तयारी अन्तिम चरणमा पुगेको छ । विष्णुपादुका क्लवले शनिवार पत्रकार सम्मेलन आयोजना गरी महोत्सवको तयारी अन्तिम चरणमा पुगेको जनाएको हो ।

क्लवका अध्यक्ष समेत रहेका मूल आयोजक समितिका अध्यक्ष सुविन श्रेष्ठले महोत्सव किसानको चाड भएको उल्लेख गर्दै महोत्सव सफल पार्न सबै मिलेर लाग्नुपर्ने बताए। उनले महोत्सवलाई कृषि, पयर्टन तथा व्यापार मेलाका रुपमा विकास गर्न खोजिएको समेत उल्लेख गरे ।

क्लव सचिव समेत रहेका मूल आयोजक समितिका महासचिव वसन्तकुमार श्रेष्ठले हेमजावासीको पहलमा संचालन गरेको महोत्सवका रुपमा राष्ट्रिय हेमजा आलु महोत्सव चिनिएको भन्दै महोत्सबसंग हेमजाको पहिचान जोडिएको बताए ।उनले यस वर्षको महोत्सव मार्फत बचत हुन आउने रकमबाट क्लवको बहुउद्देश्यीय भवन निर्माणको लक्ष्य राखिएको स्पष्ट पार्दै हेमजालाई देश विदेशमा चिनाउन आलु महोत्सवको भूमिका महत्वपूर्ण रहेको औँल्याए ।

पोखरा महानगरपालिका कृषि महाशाखा प्रमुख मनोहर कडरियाँले महोत्सवमा कृषिका गतिविधिलाई प्राथमिकता दिन सुझाव दिर्दै आलु महोत्सव किसानको महोत्सव हुनुपर्नेमा जोड दिए ।उनले उन्नत विउ प्रयोग गरिएमा नियमित अवस्थामा भन्दा १५ देखि २० प्रतिशतसम्म बढी उत्पादन लिनसकिने स्पष्ट पार्दै आलुको उत्पादनमा ध्यान दिन आयोजक समक्ष आग्रह गरे ।

त्यस अवसरमा नेपाल पत्रकार महासंघका केन्द्रीय सदस्य सरीता तिमिल्सीना पंगेनी, कृषि ज्ञान केन्द्र कास्कीका प्रमुख किरण सिग्देल, क्लवका सदस्य सन्तोष पौडेल लगायतले धारणा राख्दै आलु तरकारीको राजा भएको बताइन ।

महोत्सव तयारीको क्रममा महोत्सबस्थलमा स्टल निर्माणको कार्य धमाधम भइरहेको छ ।  कुल १ सय ४० स्टल रहनेमा ४० स्टल कृषि उपजको प्रबर्दनका  लागि छुट्टाइएको आयोजकले जनाएको छ ।

महोत्सवमा प्रतिकेजी  ३८ देखि ४० रुपैयामा आलुको कारोवार हुने आयोजकले जनाएको छन । महोत्सबमा प्रवेशका लागि ८० रुपैया शुल्क तोकिएको छ भने विद्यार्थीलाई ५० रुपैयाँ प्रवेश शुल्क राखिएको छ।

महोत्सवको आकर्षणका रुपमा आलु तथा ताजा तरकारीको प्रदर्शनी, आलुको पहाड निर्माण, आलुका विभिन्न परिकार प्रदर्शन, माटो र बोटबिरुवाको परीक्षण तथा रोगको निदान, कृषि सम्बन्धी विविध सांस्कृतिक कार्यक्रम, कृषि झाँकी प्रदर्शनी, कृषि विज्ञ र किसानबीच अन्तक्र्रिया, विभिन्न कृषि उपज, बिउबिजन तथा अन्य कृषि यन्त्रको प्रदर्शनी, कृषक सम्मान तथा पुरस्कार, रत्यौली गीत प्रतियोगिता, हास्य व्यङग्य एवम् लाइभ पप कन्सर्ट लगायत रहनेछन् ।

महोत्सवका लागि सदाझै यस वर्ष पनि ‘सुन्दर ठाँउ हेमजा जाऔं, आलुका स्वादिष्ट परिकार खाउँ, आलु एक. परिकार अनेक’ भन्ने नारालाई अगाडि सारिएको छ ।

हेमजाको कुल १२ हजार ५ सय हेक्टरमध्ये ५ सय ९० हेक्टरमा आलु खेती गरिँदै आइएको छ । जसअन्तर्गत त्यहाँका ५ सय ४० घरपरिवार किसान व्यावसायिक रुपमा आलुखेतीमा आबद्ध छन् ।

यस वर्षको महोत्सब अबधिमा हेमजामा करिव ८० टन आलुको कारोवार हुने आयोजकको अपेक्षा छ ।