पोखरा, नेपाली कांग्रेसका महाधिवेशन प्रतिनिधि एवं नेपाल किसान संघका केन्द्रीय सदस्य अमृत श्रेष्ठको मंगलवार साँझ निधन भएको छ । सोमवार वेलुका उनि बिरामी परेपछि मणिपाल शिक्षण अस्पतालमा उपचारार्थ लगिएकोमा बुधवार साँझ उनको निधन भएको हो ।
४७ वर्षिय श्रेष्ठ पोखरा महानगरपालिका वडा नं १ सिम्पानीका बासिन्दा हुन । उनका बुवा,आमा श्रीमती, एक छोरी र एक छोरा छन ।
सोमवार साँझ करिब ६ बजेतिर साथीहरुसहित नालामुख नजिकै एक रेष्टुरेन्टमा खाजा खान बसे लगत्तै उनले टाउको दुख्यो भनेको र त्यसपछि सामान्य बान्ता गरेपछि बाथरुममा गएका थिए । बाथरुमबाट ५/७ मिनेटमा पनि नफर्किएपछि हेर्न जांदा उनि बाथरुममै बान्ता गरेर बेहोस भई लडेको अवस्थामा भेटिएको खाजा खान संगै बसेका साथी प्रमोद कोईरालाले जानकारी दिएका छन ।
अमृत बिरामी परेपछि उनलाई सोमवार साँझ नै मणिपाल अस्पतालमा उपचारार्थ लगिएको थियो ।
मंगलवार बिहान अमृत गम्भीर बिरामी परेको कुरा सार्वजनिक भए लगत्तै मणिपाल अस्पतालमा नेपाली कांग्रेसका विभिन्न तहका नेता कार्यकर्ताहरु अस्पतालमा उनको स्वास्थ्य अवस्था बारेमा जानकारी लिन पुगेका थिए ।
उनको उपचारमा संलग्न डा. बालगोपाल कर्माचार्य र डा अनमोल पौडेलले मष्तिष्कमा अत्यधिक रक्तस्राव भएर रगत जमेको कारण ब्रेनले काम गर्न नसक्दा स्वास्थ्य अवस्था जटिल रहेको जानकारी दिएका थिए। सोमवार बेलुका बाट नै उनलाई भेन्टिलेटरमा राखिएको कारण मंगलवार उनको स्वास्थ्यमा चमत्कारिक सुधार आउने अपेक्षा लिएर बसेका उनका आफन्त र कांग्रेसका नेता कार्यकर्ताहरु साँझ ५ बजेपछि भने निराश बन्दै अस्पतालबाट फर्किएका थिए ।
कास्की कांग्रेसका सभापति किशोरदत्त बरालले अमृतको उपचारको सबै किसिमको पहल गर्न र आवश्यक परेमा काठमाडौ लैजान समेत पार्टीका साथीहरु तयार रहेको भनि डाक्टरहरुसंग कुरा भएपनि उनको स्वास्थ्य अवस्था अत्यन्त गम्भिर रहेको कारण स्वास्थ्यमा सुधार आउन कठिन रहने जवाफ डाक्टरहरुले दिएको बताए । मंगलवार साँझ पख उनलाई भेन्टिलेटरबाट निकाले लगत्तै डाक्टरले उनको निधन भएको घोषणा गरेका थिए ।
अमृतको शव मंगलवार राती अस्पतालमा नै राखिने र बुधवार बिहान क्रिश्चियन परम्परा अनुसार अन्त्येष्टि गरिने उनका परिवारका सदस्यले जानकारी दिएका छन ।
