पोखरा । नेपाली काँग्रेस पोखरा महानगर समितिले विहीबार पोखरा महानगरका निवर्तमान मेयर मानबहादुर जिसीले पोखरामा रहेका विभिन्न ठाउँको सरकारी जग्गा भाडामा दिन गरेको सम्झौता खारेजीको माग गरेको छ ।
महानगर समितिका सभपाति सुरेन्द्र विजुक्छेको नेतृत्वमा गएको टोलीले पोखरा महानगरपालिकाका मेयर धनराज आचार्यलाई विहिबार ध्यानाकर्षण पत्र बुझाउदै सम्झौता खारेजीको माग गरेको हो ।
पोखरा उपत्यका नगर विकास समितिका नितर्वमान अध्यक्ष समेत रहेका जिसीको कार्यकाल सकिनै लाग्दा अपारदर्शी र शंकास्पद तरिकाले पोखराका विभिन्न स्थानको ६३ रोपनी सरकारी जग्गा निजी क्षेत्रलाई दिएकोमा गम्भीर ध्यानाकर्षण भएको ध्यानाकर्षण पत्रमा उल्लेख छ ।
आफ्नो कार्यकाल सकिनै लाग्दा जिसीले नियमित रुपमा प्रकाशित हुन छाडेको पत्रिकामा सूचना छपाएर हतारमा सम्झौता गर्नु चलखेलको पुष्टि भएको भन्दै काँग्रेस पोखरा महानगर समितिले छानविनको समेत माग गरेको हो ।
‘जिसीले गरेको अपारदर्शी सम्झौता खारेज गरी पोखरा उपत्यकाका सार्वजनिक जमिन संरक्षण र सार्वजनिक हितका लागि उपयोगको सुनिश्चित गर्न हामी माग गर्दछौं’ ध्यानाकर्षण पत्रमा भनिएको छ ।
मेयर जिसीले पृथ्विचोकमा रहेको यातायातले उपभोग गर्दै आएको जग्गा राइजिङ कन्स्ट्रक्सनलाई दिएका छन् । मासिक १ लाख ३५ हजार रुपैयाँ भाडा बुझ्नेगरि मेयर जिसीले ५ रोपनी जग्गा पे पार्किङ प्रयोजनका लागि उक्त कम्पनीलाई दिएका हुन् ।
त्यसै गरी निवर्तमान मेयर जिसीले अर्को निजी कम्पनी एक्सन बिल्डर्सलाई पोखरा वडा नम्बर १७ मा पर्ने ४० रोपनी जग्गा भाडामा दिएका छन् ।
त्यसै गरी पोखरा पर्यटन बसपार्क १० वर्षको लागि शिला शालिकग्राम निर्माण सेवालाई भाडामा दिइसकेका छन् ।
यसैबीच जग्गा भाडामा दिएको प्रति विरोध गर्दै नेपाली काँग्रेस पोखरा महानगर समितिले बुधबार एक विज्ञप्ती जारी गरेको थियो ।
यसैबिच नेपाली काँग्रेस पोखरा महानगरसमितिको प्रवक्तामा पोखरा -५ बाट महानगर सदस्य बनेका धनन्जय पौडेललाई प्रवक्ता नियुक्त गरिएको छ ।
यस अगाडी समितिका सचिव टुवराज बांस्तोलालाई प्रवक्ता मनोनित गरिएपछि विधान विपरीत प्रवक्ता बनेको भनि विरोध भएपछि सभापति विजुक्छेले बास्तोलालाई हटाएर पौडेललाई प्रवक्ता बनाएका हुन् ।
काँग्रेस महानगर समितिका सभापति सुरेन्द्र विजुक्छेको अध्यक्षतामा विहीबार बसेको बैठकले पौडेललाई प्रवक्ता नियुक्त गर्ने निर्णय गरेको हो । महानगर कार्य सम्पादन समिति सदस्य रहेका पौडेललाई प्रवक्ता नियुक्त गरिएको हो ।
यसैबीच विहिबार सम्पन्न बैठकले सचिव गणेशबहादुर थापाको संयोजकत्वमा बैठक संचालन कार्य विधि निमार्ण समिति गठन गरेको छ । समितिका अन्य सदस्यमा रविन्द्र बराल र दामोदर पराजुली रहेका छन् ।
बैठकले विपी जयन्तीको अवसर पारेर साउन ६ गते खुला रक्तदान कार्यक्रमको आयोजना गर्ने निर्णय पनि गरेको छ । कोषाध्यक्ष सम्मरबहादुर श्रेष्ठलाई उक्त रक्तदान कार्यक्रमको संयोजक बनाईएको छ ।
यसैगरी बैठकले साउन महिनामा नै स्थानिय तहको निर्वाचनमा नेपाली काँग्रेसबाट निर्वाचित वडाध्यक्षहरु एवम् पार्टीका इकाई सभापतिहरुलाई प्रशिक्षण कार्यक्रमको आयोजना गर्ने निर्णय पनि गरेको छ । प्रशिक्षण कार्यक्रमको संयोजक सहसचिव संजय आले रहेका छन् ।
