पोखरा । स्थानीय तहको निर्वाचनमा पोखरा महानगरको मेयर पदमा ‘वागी’ उम्मेदवारी दिएका नेपाली कांग्रेस कास्कीका नेता विमलबहादुर कार्कीले आफ्नो उम्मेदवारी फिर्ता लिएका छन् । उम्मेदवारी फिर्तासँगै उनले गठबन्धनबाट मेयर पदमा उठेका धनराज आचार्य र नेपाली काँग्रेसकी उम्मेदवार कोपिला रानाभाटलाई समर्थन गर्ने बताएका छन् । पार्टीको नीतिप्रति असहमति जनाउदै वागी उम्मेदवार दिएका कार्कीले सोमबार उम्मेदवारी फिर्ता लिएका हुन् ।
कार्कीले सोमबार प्रेस विज्ञप्ती जारी गर्दै पार्टीले उम्मेदवारी फिर्ता गर्नका लागि दिएको निर्देशन मान्दै आफ्नो उम्मेदवारी निश्क्रिय भएको बताएका छन् । पोखरा १४ स्थानीय घर भएका काँग्रेस नेता कार्कीले भने ‘साथीभाईको सल्लाह र अग्रज नेताहरुको आग्रहलाई मान्दै मैले नेपाली काँग्रेस र गठबन्धनका आधिकारिक उम्मेदवारलाई सघाउने निर्णय लिएको छु ।’ जारी विज्ञप्तीमा उनले आफ्नो उम्मेदवारी आजैदेखि निश्क्रिय भएको उल्लेख गरेका छन् ।
यसैबीच नेपाली काँग्रेस कास्कीले पनि नेता विमलबहादुर कार्कीलाई धन्यबाद ज्ञापन गरेको छ । पार्टी भित्र असन्तुष्टी भएपनि आन्तरिक रुपमा मिलाउने र गठबन्धनका उम्मेदवारलाई जिताउने गरि कार्कीले उम्मेदवारी फिर्ता लिएकोमा आफू निकै खुशी भएको काँग्रेस कास्कीका सभाापति किशोरदत्त बरालले बताए । ‘बिमलबहादुर कार्कीज्यूले पार्टीलाई सघाउने काम गर्नुभएको छ, यो उदाहरणीय काम पनि हो’ कास्की काँग्रेस सभापति बरालले भने ।
गठबन्धनको साझा उम्मेदवारलाई बागी उम्मेदवारकै कारण भोट काटिने चिन्ता पनि अब हटेको कास्की काँग्रेसले बताएको छ ।
