समाजमा व्याप्त बेतिथि र भ्रष्टाचारको विरुद्धमा काम गर्छु –वडा १ का वडाध्यक्ष उम्मेदवार  सीता गुरुङ

पोखरा । पोखराको सामाजिक अनि राजनीतिक क्षेत्रमा परिचित नाम हो सीता गुरुङ । हरेक क्षेत्रमा महिला सहभागिता समान हुनुपर्छ, विशेष गरी आर्थिक पक्षमा सवल हुन सक्नु पर्छ भन्दै महिलालाई अर्थोपार्जनमा झक्झकाई रहने व्यक्ति हुन् सीता । यही वैशाख ३० गते हुन गईरहेको स्थानीय तहको निर्वाचनमा पोखरा उपमहानगरपालिका वडा नं १ का वडाध्यक्ष पदका उम्मेदवार  ।
वि.स.२०४२ तिर नै तरुण दल कास्कीको सदस्यता लिएर नेपाली राजनीतिमा होमिएकी सीता नेपाली काँग्रेसको भातृ संस्था हुदै काँग्रेसको राजनीतिमा लागेकी हुन् । नेपाल महिला संघ कास्कीका सचिव समेत रहेकी सीता नेपाली काँग्रेसको १४ औं महाधिवेशनबाट निर्वाचित नेपाली काँग्रेस गण्डकी प्रदेश कार्य समिति सदस्य हुन् ।

लामो राजनीतिक अनुभव र न्यायको पक्षमा वकालत गर्ने बानी; उनको यही बानीले वडाबासीको मन सहजै जित्न सकेकी छिन्  । अरुको नजरमा एक महिला वा आदिबासी जनजाति महिला तर उनीसंग युवा जोश, युवा संकल्प र युवा भिजन छ, जुन वडाको विकासमा लगाउन तयार छिन् । उनको चुनावी प्रतिबद्धता नै समाज विकास हो । उनको चुनावी एजेण्डा समान सहभागिता र समान प्रतिनिधित्व हो । अर्थोपार्जनमा एकिकृत भई वडालाई समृद्धि बनाउनु उनको अर्को प्रतिबद्धता हो । वडाबासीको शैक्षिक, सामाजिक, आर्थिक, राजनीतिक परिवर्तनकालागि नेपाली काँग्रेसको तर्फबाट वडा नं १ को वडाध्यक्षको उम्मेदवार बनेकी सीता आफ्ना सपनालाई जीतमा परिणत गर्न मतदातको घरदैलोमा पुगीरहेकी छिन् । बिहान सबेरैदेखि व्यस्त बन्ने उनले मतदातासंग भोट माग्नकालागि मात्रै नभई उनीहरुको आवश्यकता र अभावका बारेमा भलाकुसारी पनि गर्दैआईरहेकी छिन् । मतदाताको सुखदुख र आवश्यकताका बारे भलाकुसारी गर्दै आफुभन्दा ठुलासंग आशिर्वाद लिदाँ कार्यकर्ता र मतदाताले देखाएको उत्साह र सहभागिताले जीत आफनो पोल्टामा आउनेमा उनी ढुक्क छिन् ।

गएको स्थानीय निर्वाचनमा वडा नं १ बाट वडाध्यक्षमा महिलाले नै जित हात पारेकी थिइन् । तथापि उपलब्धिमुलक काम केही पनि नगरेकाले वडाबासीले महिला उम्मेदवारलाई सकारात्मक रुपमा नलिएको तितो अनुभव पनि बटुलेकी छिन् उनले । यद्यपी मतदाता भेटघाटको क्रममा मतदातालाई आफुले उम्मेदवारी दिनुको उद्धेश्य र मतदाता र वडाबासीका लागि तय गरिएको काम कर्तव्यका बारे प्रतिबद्धता स्पष्ट पारी आफ्नो पक्षमा पार्न सफल भएको खुशी पनि छ उनीसंग । यसैले पनि आफुले चुनाव जित्ने आत्मबल बढेको बताउँछिन् ।

स्थानीय तहको निर्वाचन आउन मात्र चार दिन बाँकी छ । जति जति निर्वाचनको मिति नजिकिदै छ उती नै व्यस्तता बढ्दो छ सीताको । स्थानीय तहको निर्वाचनको मिति घोषणा र उम्मेदवारी मनोनयनसंगै बढेको उनको व्यस्तता अहिले झन् बढ्दो क्रममा छ ।
‘महिलाले केही गर्न सक्दैनन् भन्नेलाई नेतृत्व लिएर देखाउनु छ अनि आर्थिक क्रान्तिसंगै विकास निर्माणका काम गर्नुछ’ सीता भन्छिन् ‘खानेपानी र बाटोको सुविधा नपुगेको टोलहरुमा मेरो पहिलो प्राथमिकता उनीहरुको आवश्यकता पूर्ति गर्नु हुनेछ ।’ सेतीनदी नजिक बस्ती रहेको कसेरी र शान्तिटोल क्षेत्र जोखिमयुक्त रहेकोले पनि वर्षायाममा हुन सक्ने क्षतिलाई मध्यनजर गरी संरक्षणका लागि पहल गर्ने प्रतिबद्धता समेत उनले गरेकी छिन् । उनको प्रतिबद्धता समाजमा व्याप्त बेतेथि र भ्रष्टाचारको विरुद्धमा लड्नु हो । वडाबासीको पक्षमा र रुपान्तरणको पक्षमा लाग्नु उनको अर्को अठोट हो

नेपाली काँग्रेसको तर्फबाट वडाध्यक्ष पदका उम्मेदवार सीता गुरुङको नेतृत्वमा सदस्य पदका उम्मेदवारहरु पार्वती खनाल, सुनिता कुँवर नेपाली, मेघबहादुर गुरुङ र रामजीप्रसाद पौडेल चुनावी मैदानमा रहेका छन् ।