पोखरा । नयाँ पर्यटकीय गन्तव्यका रूपमा थपिएको अन्नपूर्ण केवलकार पोखराले चैत्र १ गतेबाट बिहान ५ बजेदेखि सेवा सञ्चालनमा ल्याउने भएको छ । सुरक्षा जाँच तथा नियमित मर्मतसम्भारकालागि फागुन २५ गतेदेखि बन्द रहेको केवलकार नयाँ समयतालिकाका साथ चैत्र १ गतेदेखि पुन संचालनमा आउन लागेको हो ।
पोखरा महानगरपालिका–१८ को सेदी बगरमा निर्माण भएको अन्नपूर्ण केवलकार चैत्र १ गतेबाट बिहान ५ बजेदेखि सांझ ६ बजेसम्म संचालनमा ल्याउन लागेको केवलकारका महाप्रबन्धक दिनेश पौड्यालले जानकारी दिए।
बिहानी सेवा संचालनसंगै पयर्टकहरुले बिहानको सूर्योदयको दर्शन तथा सांझ सूर्यास्तको अवलोकन गर्न सकिने महाप्रबन्धक पौड्यालले बताए । यसका साथै केवलकारबाट फेवाताल, अन्नपूर्ण, माछापुच्छ्रे, हिमचुली लगायतका हिमालहरु र पोखराका मनोरम दृश्य नियाल्न सकिनेछ ।
गत फागुन ६ गते सफ्ट ओपनिङ गरेपछि व्यावसायिक सञ्चालनमा आएको केवलकारले नेपालीका लागि रु ७ सय, सार्क राष्ट्रका पर्यटकका लागि रु ८ सय र तेस्रो मुलुकका नागरिकका लागि नौ डलर भाडादर तय गरेको छ ।
विद्यार्थी र ज्येष्ठ नागरिकका लागि २५ प्रतिशत छुट, अपाङ्गता भएका व्यक्तिका लागि भने भाडामा ५० प्रतिशत छुटको व्यवस्था भएको कम्पनीले जनाएको छ ।
