पोखरा १५ असार । जिल्ला प्रशासन कार्यालय कास्कीले स्वरुप परिवर्तन गर्दै निषेधाज्ञाको समय लम्ब्याएको छ । असार १५गतेको मध्यरातसम्म जारी निषेधाज्ञा स्वरुप परिवर्तन सहित असार २५को मध्यरातसम्म लम्ब्याइएको हो ।
कोरोना भाइरसको संक्रमण मृत्युदर केही घटेपनि अपेक्षाकृत नभएको उल्लेख गर्दै प्रशासनले स्वरुप परिवर्तन सहित केही केहि खुकुलो बनाएको छ । जसअनुसार अब सार्वजनिक सवारीहरु गुड्ने भएका छन् । स्वास्थ्य मापदण्डको पुर्ण पालना गरि जोर गते जोर नम्वर प्लेटका सवारी साधन र बिजोर गते बिजोर नम्बर प्लेटका सवारी चल्न पाउने प्रशासनले सुचना जारी गरेको छ ।
यस्तै १२ बजेसम्म मात्रै पसल व्यवसाय सञ्चालन हुँदै आएकोमा मंगलबारको मध्यरातदेखि खाद्यान्नका पसलहरु बिहान ५ देखि साँझ ६ बजेसम्म सञ्चालन गर्न पाइने छ भने खाद्यान्नका पसल बाहेकलाई बिहान ११ देखि साँझ ६ बजेसम्म सञ्चालन गर्न दिइने प्रशासनले जनाएको छ ।
