मर्दी पदयात्राको हाइक्याम्पमा शुक्रबार साँझ ६ बजे पानीको पाइप मर्मत गर्ने क्रममा भीरबाट लडेर गौतमको मृत्यु भएको प्रहरीले जानकारी दिएको छ । गौतमले हाइक्याम्पमा होटल सञ्चालन गर्दै आएका थिए । गौतम भीरबाट अन्दाजी ५१ मीटर तल खसेको माछापुच्छ गाउँपालिका वडा नम्बर ९ का वडाध्यक्ष राजेन्द्र क्षेत्रीले जानकारी दिए ।

होटल व्यवसायी अर्को एक जना साथीसँग गौतम पानी मर्मत गर्न गएका थिए । गौतमको टाउकोमा चोट लागेको थियो । घटना लगत्तै स्थानीयले उद्धार गरेर ल्याए पनि उनको बाटोमा नै मृत्यु भएको अध्यक्ष क्षेत्रीले बताए ।

त्यसपछि शनिबार विहान मात्र हेलिकोप्टरमा प्रहरी , गाउपालिका अध्यक्ष मिन बहादुर गुरुडं,  उपाध्यक्ष सिता अधिकारी र केही पर्यटन व्यवसायी सहितको टोली मर्दी हाई क्याम्प पुगेर उनको शव पोखरा ल्याएको थियो । गौतमको शबको पश्चिमाञ्चल क्षेत्रीय अस्पतालमा पोस्टमार्टम गरेपछि केही समय नेपाली कांग्रेस कास्कीको प्रांगणमा अन्तिम श्रदान्जलीको लागि राख्ने योजना जिल्ला समितिका केही पदाधिकारी र सदस्यहरुले गरेपनि गौतमको शव रामघाट स्थित अस्पतालबाट सिधा हेम्जा स्थित उनका काकाको घरमा लगेर अन्तिम श्रद्दान्जली अर्पण गरिएको थियो । कतिपय कांग्रेस कार्यकर्ता भने चिप्लेढुंगा स्थित पार्टी कार्यालयमा फ़ुल समेत लिएर प्रतिक्षा गरिरहेको थिए ।