काठमाडौँ, काठमाडौं महानगरपालिका–१० बुद्धनगर निवासी ४५ वर्षीय उद्योगी तथा व्यवसायी अश्विन राउतले शनिबार बिहान आत्मदाहको प्रयास गरेका छन्। गम्भीर रूपमा घाइते भएका उनको हाल वीर अस्पतालमा उपचार भइरहेको छ। अस्पताल स्रोतका अनुसार राउतको शरीरको करिब ५५ प्रतिशत भाग जलेको छ। घटनापछि स्थानीय र सुरक्षाकर्मीको सहयोगमा तत्काल उद्धार गरी उनलाई उपचारका लागि वीर अस्पताल पुर्‍याइएको थियो।

जिल्ला प्रहरी परिसर काठमाडौंका अनुसार प्रारम्भिक अनुसन्धानमा पारिवारिक विवादपछि आफ्नै घरको भान्सामा उनले शरीरमा आगो लगाएको देखिएको छ। घटनाका सबै पक्षबारे विस्तृत अनुसन्धान भइरहेको प्रहरीले जनाएको छ। पारिवारिक तथा निकट स्रोतका अनुसार राउतले मकवानपुरको हेटौंडामा ग्याबिन उद्योग सञ्चालन गर्दै आएका थिए। उनी निर्माण सामग्री उत्पादनसँगै घरायसी विद्युतीय सामग्री आयात–व्यवसायमा पनि सक्रिय थिए।

स्रोतका अनुसार पछिल्ला केही महिनादेखि व्यवसायमा बढ्दो आर्थिक दबाबका कारण उनी मानसिक तनावमा रहेको बताइएको छ। आर्थिक चुनौतीसँगै स्वास्थ्यसम्बन्धी समस्या पनि देखिएको र केही महिनाअघि उपचारका लागि भारत गएर उपचारपछि नेपाल फर्किएको जानकारी प्राप्त भएको छ। प्रहरीका अनुसार घटनाको तत्कालीन कारण पारिवारिक विवाद देखिए पनि यसको पृष्ठभूमिमा लामो समयदेखिको आर्थिक दबाब र स्वास्थ्यसम्बन्धी अवस्थाले समेत प्रभाव पारेको हुन सक्ने प्रारम्भिक अनुमान गरिएको छ। यद्यपि घटनाको वास्तविक कारणबारे अनुसन्धान जारी रहेको प्रहरीले बताएको छ ।