पोखरा, गण्डकी मेडिकल कलेज (जिएमसी) ले बिनाअपरेशन पित्त नलीको ढुंगा निकाल्ने इआरसीपी सेवा सुरु गरेको छ । डा. शंकर बरालको नेतृत्वमा पेट तथा कलेजो रोग विशेषज्ञ टोलीले शुरु गरेको उक्त प्रबिधि अन्तर्गत पेट नचिरिकन मुखबाट ड्युडेनोस्कोपी मार्फत पित्त नली र प्यानक्रियाज नलीका समस्या समाधान गर्ने सकिन्छ यसलाई आधुनिक उपचार प्रविधिको रुपमा पनि लिईएको छ ।

डा. बरालका अनुसार इआरसीपी सेवाले जन्डिस भएका बिरामी, पित्त नली र प्यानक्रियाज क्यान्सरका बिरामी, साथै पित्त नली साँघुरिएको कारण समस्यामा परेकाबिरामीलाई सहज र प्रभावकारी उपचार उपलब्ध गराउँछ। यो प्रबिधिबाट उपचार गर्दा बिगतमा जस्तो ठूलो शल्यक्रियाको आवश्यकता नपर्ने भएकोले  बिरामीलाई आराम मिल्ने र स्वास्थ्यमा छिटो सुधार आउन सक्नेछ ।

इआरसीपी सेवा सुरु भएसँगै ग्यास्ट्रो विभागले अन्य नयाँ उपचार सेवा पनि सञ्चालनमा ल्याएको छ । ती सेवामा एपिसी (APC), इसोफेजियल कार्सिनोमाका बिरामीका लागि मेटालिक स्टेन्टिङ, नली साँघुरो भएको ठाउँ खोल्ने बेलुन डाइलेटेसन, र पेटमा खाना खुवाउने नली राख्ने पेग ट्युब प्लेसमेन्ट समावेश छन् ।

यसैगरी, पोलिपेक्टोमी र भेरिसेसका लागि ग्लु इन्जेक्सन सेवा पनि अस्पतालमा शुरु भएको छ । जिएमसीका सिइओ डा.रविन्द्र श्रेष्ठ र मेडिकल सुपरिटेन्डेन्ट डा.टुमाया घलेका अनुसार अस्पतालले शुरु गरेका यी सेवाहरूको कारण गण्डकी प्रदेशभरका पेट, आन्द्रा, प्यानक्रियाज र कलेजोका बिरामीले आधुनिक र सहज उपचार सुविधा पाउनसक्ने बिश्वास गरिएको छ।

‘अब बिरामीहरूले उपचारको लागि पोखरा बाहिर जानुपर्ने आवश्यकता छैन र गण्डकी प्रदेशमै उच्चस्तरीय सेवाहरू उपलब्ध हुनेछ’ डा. श्रेष्ठले गुरुकुल खबरसंग भने। जिएमसीको यो नयाँ पहलले स्वास्थ्य क्षेत्रलाई थप आधुनिक बनाउँदै प्रदेशभरका बिरामीहरूको जीवनस्तरमा सुधार ल्याउने अपेक्षा गरिएको छ । जीएमसीमा उपलब्ध इआरसीपी लगायतका सेवा सरकारको स्वास्थ्य बीमा कार्यक्रम र भारतीय पेन्सनर अन्तरगत इसीएचएसमा पनि उपलब्ध रहेको अस्पतालमा कार्यरत कृष्णप्रसाद पौडेलले जानकारी दिए  ।