पोखरा, राजसंस्था पुनस्थापनाको लागि शुरु भएको संयुक्त जनआन्दोलन समितिका संयोजक नबराज सुबेदीले सरकारबाट नियोजित रुपमा घुषपैठ र अनपेक्षित प्रहरी दमनका कारण शुक्रबार आयोजित प्रदर्शन हिंसात्मक बनेको बताएका छन।शनिबार एक बिज्ञप्ती जारी गर्दै उनले सभामा उपस्थित नागरिक माथि अश्रुग्यास र गोलि प्रहार गर्ने, तोडफोड र आगजनी गराई आतंक सिर्जना गर्ने काम सरकारपक्षबाट नै भएको दाबि गरेका छन। ८७ बर्षीय बृद्ध सुबेदीलाई सरकारले नजरबन्दमा राखेको भएपनि उनको नामबाट यो बिज्ञप्ती सार्बजनिक भएको हो।

आन्दोलनको कुनै पनि घटनामा संलग्न नभएका कमान्डर दुर्गा प्रसाईंलाई पक्राउ गर्न वारेन्ट जारी गर्ने र अन्य केहि सहयोद्धा रबिन्द्र मिश्र, धवल शमशेर र स्वागत नेपाल लगायतलाई पक्राउ गरिएको र स्वयम् आँफुलाई नजरबन्दमा राखिएको उनले स्पष्ट पारेका छन। बिज्ञप्तीमा भनिएको छ,” श्री ५ महाराजधिराजलाइ समेत बदनाम गराउने र घटनामा संलग्नता देखाउने उद्धेश्यले नजरबन्दमा राख्ने वा पक्राउ गर्ने तयारी भैरहेको भन्ने कुरा सार्बजनिक भैरहेको भन्दै त्यस्तो भएमा देशभरबाट आमसर्बसाधारण स्वतस्फुर्त रुपमा बिरोधमा उत्रिने छन भन्ने जानकारीमा आएको छ।” यस्तो प्रयास गरिएको हो भने हामी घोर भर्त्सना गर्दछौं सुबेदीले भनेका छन।

जनचाहना र जनबिद्रोहबाट हुने आन्दोलनको अगुवाई र नेतृत्व पनि जनताले नै गर्छन भन्दै बिज्ञप्तिमा जनताले दमन र बर्बरता बिरुद्ध देशभर शान्तिपूर्ण रुपले आन्दोलन गर्ने र जनता अगाडी लागेर जनचाहना अनुरुप हुने आन्दोलनमा आफुहरुको सहयोग र समर्थन रहने समेत स्पष्ट पारेका छन। सुबेदीले देशभक्त जनताको आन्दोलन जारी रहेको तर धमिलो पानीमा माछा मार्ने प्रयास कतैबाट नहोस भन्ने चेतावनी समेत उनले बिज्ञप्तीमार्फत दिएका छन।