पोखरा, आन्तरिक राजस्व कार्यालय पोखराले चालु आर्थिक वर्षको असोज मसान्तसम्ममा लक्ष्यभन्दा १३ प्रतिशत बढी अर्थात १ अर्ब ७१ करोड ५७ लाख ९८ हजार रुपैयाँ राजस्व संकलन गरेको जनाएको छ । त्यस अवधिमा कार्यालयले १ अर्ब ५१ करोड २७ लाख ७६ हजार रुपैयाँ राजस्व संकलन गर्ने लक्ष राखेको भएपनि लक्ष भन्दा बढी राजस्व संकलन भएको हो । गत असोज मसान्तसम्ममा कार्यालयले लक्ष्य गरेभन्दा भन्दा २० करोड ३० लाख २२ हजार रुपैयाँ बढी राजस्व संकलन भएको बुझिएको छ ।
कार्यालयले समग्र राजस्व संकलनमा लक्ष भन्दा बढी प्रगति गरेको देखिएपनि घर बहालकर, ब्याज कर र मूल्य अभिवृद्धि कर (मूअकर) मा भने लक्ष्य भन्दा निकै कम राजस्व संकलन भएको बुझिएको छ । १ करोड ८१ लाख ९१ हजार रुपैयाँ राजस्व संकलन गर्ने लक्ष्य राखिएको घर बहालकर शिर्षकमा १ करोड ३१ लाख ३८ हजार रुपैयाँ (७२ प्रतिशत) मात्र राजस्व संकलन भएको छ।
यसैगरी ब्याज करतर्फ ९ करोड ८८ लाख ८२ हजार रुपैयाँ राजस्व उठाउने लक्ष्य राखिएकामा ४ करोड ८७ लाख १५ हजार रुपैयाँ (४९ प्रतिशत) मात्र संकलन भएको आन्तरिक राजस्व कार्यालय पोखराका प्रमुख कर अधिकृत शिबप्रसाद ढुंगानाले गुरुकुल खबरलाई जानकारी दिए। मूल्य अभिवृद्धि करतर्फ पनि ५३ करोड ३२ लाख ९९ हजार रुपैयाँ लक्ष्य राखिएकोमा त्यस अबधिमा १५ प्रतिशत कम राजस्व संकलन भएको ढुंगानाले बताए ।
प्रमुख कर अधिकृत ढुंगानाका अनुसार पोखरामा संकलित राजस्व मध्ये आयकर तर्फको राजस्व लक्ष्यभन्दा बढी संकलन भएको हो । यस अवधिमा आयकरतर्फ ७९ करोड ४४ लाख ८३ हजार रुपैयाँ संकलन गर्ने लक्ष्य राखिएको भएपनि १ अर्ब ८ करोड ८३ लाख २२ हजार रुपैयाँ जम्मा भएको ढुंगानाले जानकारी दिए।
अन्तःशुल्क र अन्य कर संकलनमा पनि उल्लेखनीय प्रगति भएको छ । ६ करोड १७ लाख ४५ हजार रुपैयाँ लक्ष्य रहेको अन्तःशुल्कतर्फ ४३ प्रतिशत बढी अर्थात् ८ करोड ८३ लाख २२ हजार रुपैयाँ संकलन भएको छ । त्यस्तै अन्य करमा ६१ लाख ७६ हजार रुपैयाँ लक्ष्य राखिएकोमा २ करोड ३७ लाख ६ हजार रुपैयाँ जम्मा भएको छ । नेपाल सरकारले उपलब्ध गराएका छुट सुविधा र करदाता प्रोत्साहन कार्यक्रमका कारण लक्ष्यभन्दा बढी राजस्व संकलन भएको प्रमुख कर अधिकृत ढुंगानाले बताए ।
