बागलुङ । राष्ट्रपति रामचन्द्र पौडलले बागलुङ नगरपालिका–४ कुँडुलेस्थित शालग्राम सङ्ग्रहालयको अवलोकन गर्नुभएको छ । सातौँ बागलुङ महोत्सवको उद्घाटनका लागि बुधबार बागलुङ आउनुभएका राष्ट्रपति पौडेल यहाँ आई उक्त सङ्ग्रहालयको अवलोकन गर्नुभएको हो ।
बागलुङ नगरपालिका– ४ कुँडुलेमा अवस्थित श्री रङ्गबैंकटेश मुक्तिनारायण मन्दिर संस्कृत पाठशालामा समेत उपस्थित हुनुभई शालग्राम संग्राहलय र मन्दिरको दर्शन तथा अवलोकन गर्नुभएको थियो ।
त्यस अवसरमा मुक्तिनाथबाबाले आफ्ना सत्संकल्पबाट आगामी फल्गुण ९ गतेबाट २३ गतेसम्म आयोजित अनन्तश्री ब्रह्माण्डीय महायज्ञको बारेमा जानकारी गराउँदै सो महायज्ञको शुभारम्भको उद्घाटनमा सहभागिताका लागि राष्ट्रपतिलाई निमन्त्रणा समेत गर्नुभएको थियो ।
संग्रहालय अवलोकन गर्न कुँडुले पुग्नुभएका राष्ट्रपति पौडेललाई मुक्तिनाथ पीठाधीश्वर स्वामी कमलनयनाचार्य, ऋषि प्रपन्नाचार्यलगायतले स्वागत गर्नुभएको थियो । सङ्ग्रहालय अवलोकनपछि राष्ट्रपति पौडेलले विष्णु भगवानको प्रत्यक्ष अवतार शालिग्रामको संग्रह गरेकामा धन्यवाद दिनुभयो ।
त्यस अवसरमा राष्ट्रपति पौडेलले भन्नुभयो “मैले बागलुङमा धेरै समय बिताएँ मलाई यहाँ आएपछि आफ्नै घर आएजस्तो लाग्छ ।” उहाँले २०४६ सालको जनआन्दोलनमा बागलुङ कारागारमा जेल जीवन बिताएको उल्लेख गर्नुभयो । राष्ट्रपति पौडेलले कालीगण्डकीको धेरै ठूलो महत्व रहेकाले यसको संरक्षणमा जोड दिनुभयो । कालीगण्डकीको संरक्षण नगरे बागमतीको जस्तै अवस्था हुने उहाँको भनाइ थियो ।
नेपाल धार्मिक, सांस्कृतिक र परम्पराले भरिएको मुलक भएको उल्लेख गर्दै राष्ट्रपति पौडेलले सांस्कृति पक्षको संरक्षणमा सबै पक्षले ध्यान दिनुपर्ने बताउनुभयो । “पानीको स्रोतको सुरक्षा गर्न जरुरी छ, पानी भएर नै सिङ्गो जगत छ, त्यसले गर्दा हिमाल, वन जङ्गलको संरक्षण गर्नुपर्छ, कालीगण्डकी धार्मिक हिसाबले निकै महत्वपूण रहेकाले यसको संरक्षणमा लागौँ”, राष्ट्रपति पौडेलले भन्नुभयो– “म बागलुङको मायाले यो स्थानमा पुगेको छु, यहाँ मैले धेरै समय बिताएको छु, यहाँको जनताले मलाई यहाँसम्म पुर्याएका हुन ।”
बागलुङको सर्वसिद्धीधाम पञ्चकोटमा आयोजित सो ‘अनन्तश्री ब्रह्माण्डीय महायज्ञ’ को तयारी तीव्र रुपमा गरिएको छ । पवित्र मुक्तिक्षेत्र, शालग्रामबाहिनी कृष्णगण्डकी तट र अन्नपूर्ण, धौलागिरि हिमशृङ्खलाको काखमा अवस्थित प्रसिद्ध पञ्चकोट धाममा मुक्तिनाथ पीठाधीश्वसर स्वामी कमलनयनाचार्यको सङ्कल्पमा आगामी फागुन ९ देखि २२ गतेसम्म सो महायज्ञ गर्न लागिएको हो । पञ्चकोट धाम स्थापनाको १०औँ वार्षिकोत्सव पारेर आयोजना गर्न लागिएको यस महायज्ञबाट वैदिक परम्पराको प्रवद्र्धन, आध्यात्मिक चेतनाको अभिवृद्धि, सनातन संस्कृतिको संरक्षणका साथै नेपालको धार्मिक पर्यटन विकासमा टेवा पुग्ने अपेक्षा गरिएको छ ।
यस महायज्ञका परिकल्पनाकार एवं पञ्चकोटधामका संस्थापक स्वामी कमलनयनाचार्यले प्रसिद्ध मुक्तिक्षेत्र र शालग्रामको महिमालाई विश्वस्तरमा पुर्याउन, गोवंशको संरक्षणार्थ वैदिक सनातन हिन्दू समाजलाई प्रेरित गर्न, नेपालको जलसम्पदाको संरक्षण गर्न र वैदिक सनातन हिन्दू धर्मको रक्षा गरी नैतिक, समुन्नत र सच्चरित्रवान् नेपाली समाजको पुनर्जागरण गर्न नेपालमै पहिलोपटक ब्रह्माण्डीय महायज्ञको आयोजना गरिएको जानकारी दिँदै समग्र नेपालीलाई सो महायज्ञमा सहभागिताका लागि आग्रह गर्दै आउनुभएको छ ।
हिजो बागलुङ्मा सुरु भएको बागलुङ महोत्सवको उद्घाटन कार्यक्रमका बक्ताहरु बागलुङ नगरपालिका प्रमुख वशन्त श्रेष्ठ, बागमती प्रदेशका पर्यटन मन्त्री दीेपेन्द्रबहादुर थापा लगायतले सो महायज्ञको तयारीका आफूहरु पनि लागेको र त्यसमा सहभागी हुन सबैलाई आग्रह गर्नुभएको थियो ।
