पोखरा, मनाङ एयरको नाइन एन–एमभी कलसाइनको हेलिकप्टर सोलुखुम्बुको लिखुपिके गाउँपालिकास्थित लाम्जुरापास क्षेत्रमा दुर्घटनामा परेको छ । सोलुखुम्बुको सुर्केबाट काठमाडौंका लागि उडेको हेलिकोप्टरमा पाँच जना मेक्सिकन नागरिक र एक नेपाली पाइलट सवार थिए ।

कोशी प्रदेशका प्रमुख डिआइजी राजेशनाथ बास्तोलाका अनुसार दुर्घटनास्थलमा असई निराजन बस्नेतको कमाण्डमा टोली परिचालन गरिएको छ । लिखु पिके गाउँपालिका ५ को सिमामा भएको दुर्घटनास्थलमा हालसम्म पाँच जनाको सव फेला परेको प्रहरीले जनाएको छ । दुर्घटना पछि हेलिकोप्टरमा आगो लागेको छ ।

फेला परेका सवको पहिचान खुल्न बाँकी छ । घटनास्थलमा स्थानीय वासिन्दा पनि पुगेको जनाइएको छ । सोलुखुम्बुको सुर्केबाट बिहान ९ बजेर ५२ मिनेट जाँदा उडेको हेलिकप्टर १२ मिनेटमै सम्पर्क विहिन भएपछि खोजीका लागि अर्को हेलिकोप्टर पठाइएको थियो । ११ बजे काठमाडौं पुग्नुपर्ने हेलिकोप्टर पाइलट चेतबहादुर गुरूङले उडाएका थिए ।