पोखरा, पूर्वी नवलपरासीको बिनयी त्रिवेणी गाउँपालिका–२ स्थित चौसठ्ठी मोडमा यात्रुवाहक बस दुर्घटना हुँदा कम्तिमा ५ जनाको मृत्यु भएको छ। आज शनिबार बिहान करिब ४ बजे नेपालगन्जबाट काठमाडौं आउँदै गरेको बस पूर्व–पश्चिम राजमार्गअन्तर्गत एस मोडमा दुर्घटनामा परेको हो।प्रदेश–३–०१–००६ ख १५५३ नम्बरको बस सडकबाट तल नालामा पल्टिएर दुर्घटना भएको थियो। सशस्त्र प्रहरी बल नेपालका सहप्रवक्ता डिएसपी शैलेन्द्र थापाका अनुसार बसमा सवार १८ जनामध्ये ५ जनाको मृत्यु भएको र १३ जना घाइते भएका छन्।
बसमा १८ जना सवार रहेकोमा ६ जनाको मृत्यु भएको छ भने १० जना घाइते भएका छन्। दुर्घटनापछि घाइतेलाई उद्धार गरी उपचारका लागि मध्यविन्दु प्रादेशिक अस्पताल डण्डा लगिएको छ। घटनास्थलमा एक जना मानिस च्यापिएकोले उनलाई निकाल्न दुई वटा क्रेनको प्रयोग गरिएको थियो।
घाइते गोरखाको गोरखा नगरपालिका–९ का ३० वर्षीय हरिशरण थापा, अछामको मंगलसेन नगरपालिका–६ का २८ वर्षीय तेजेन्द्र प्रसाद भण्डारी, बर्दियाको ठाकुरबाबा नगरपालिका–१ की २० वर्षीया आकृती थारु र बाजुराको स्वामी कात्तिक गाउँपालिका–५ का ३२ वर्षीय पवन बुढाको अवस्था मध्यम छ। बर्दियाको राजापुर नगरपालिका–९ का २८ वर्षीय सञ्जय थारुको अनुहार र दुवै हातमा चोट लागेको छ।
बाजुराको स्वामी कात्तिक गाउँपालिका–१ का २५ वर्षीय प्रेम बमको कम्मरमा चोट लागेको छ। ललितपुरको कुञ्जय सोमपाक गाउँपालिका–५ का २९ वर्षीय अनोज खत्रीको टाउकोमा चोट लागेको छ। उनी बोल्न सक्ने अवस्थामा छन्। बर्दियाको बाँसगढी नगरपालिका–७ का ३६ वर्षीय लालबहादुर कार्कीको कम्मर र टाउकोमा चोट लागेको छ। बाँकेको नेपालगन्ज उपमहानगरपालिका–१६ का ४८ वर्षीय अस्लाम भगवानको टाउकोमा चोट लागेको छ। सल्यानको वनगाड कुपिण्डे नगरपालिका–१ का २१ वर्षीय अनिल बुढाथोकीको बायाँ हातमा सामान्य चोट लागेको छ।
