पोखरा, गण्डकी प्रदेशको बागलुङ जिल्लाको बिभिन्न स्थानमा बाढी पहिरोका कारण मृत्यु हुनेको संख्या १२ पुगेको छ । पछिल्लो तीन दिनयता बागलुङको ताराखोला र तमानखोला लगायत विभिन्न स्थानमा गएको पहिरोले घर पुरिँदा १२ जनाको मृत्यु भएको र एकजना अझै बेपत्ता भएको प्रहरीले जनाएको छ ।

बाग्लुंगको ताराखोला गाउँपालिका–५ सिपमा पहिरोले घर पुरिँदा दुईजनाको मृत्यु भएको जिल्ला प्रहरी कार्यालय बाग्लुंगले जनाएको छ । घर पुरिँदा ५५ वर्षीय दिलबहादुर पुन र उनकी सासु म्याग्दीको मालिका गाउँपालिका–२ की ७९ वर्षीय नरमाया रोकाको मृत्यु भएको प्रहरी उपरीक्षक फणीन्द्र प्रसाईंले जानकारी दिए । पहिरोमा परी पुनकी श्रीमती, दुई छोरा र बुहारी सामान्य घाइते भएका छन ।

शनिबार ताराखोलामा पनि बाढी र पहिरोका कारण एकजनाको मृत्यु भएको थियो । यसगरी आइतबार बागलुङको तमानखोला गाउँपालिकामा चारजनाको मृत्यु भएको र एक बेपत्ता भएका थिए भने निसीखोला गाउँपालिकामा पाँचजनाको मृत्यु भएको थियो ।