पोखरा, गण्डकी प्रज्ञा प्रतिष्ठानमा ललितकला क्षेत्रको मौलिक पहिचान, अस्तित्व र न्यायोचित प्रतिनिधित्वको माग गर्दै कलाकारहरू कानुनी संघर्षमा उत्रिएका छन्। प्राज्ञ नगेन सिंह ठकुरी, शिव शिर्पाली र पार्वती अधिकारीले संयुक्त रूपमा विज्ञप्ति जारी गर्दै गण्डकी प्रदेशका मुख्यमन्त्रीलाई विपक्षी बनाई उच्च अदालत पोखरामा मुद्दा दर्ता गरिएको जानकारी दिएका हुन्।
सिर्जनाशील कलाकार समूह, नेपाल व्यावसायिक कलाकार संघ र नेपाल कमर्सियल आर्टिस्ट संघले एक वर्षअघि नै प्रदेश सरकारसमक्ष आफ्ना मागसहित ध्यानाकर्षण पत्र बुझाए पनि लगातार बेवास्ता र उपेक्षा भएपछि बाध्य भएर कानुनी बाटो रोज्नुपरेको कलाकारहरूको भनाइ छ।
उनीहरुले प्रतिष्ठानका शीर्ष तीन पदाधिकारीमध्ये कम्तीमा एक पदमा ललितकला क्षेत्रको सशक्त नेतृत्व हुनुपर्ने, परिषद् र प्राज्ञ सभाका सदस्यहरू गरी समग्र संरचनामा ललितकला क्षेत्रबाट कम्तीमा ६ जना स्रष्टा-प्राज्ञहरूको प्रतिनिधित्व सुनिश्चित गरिनुपर्ने र स्वायत्त ‘ललितकला प्रज्ञा प्रतिष्ठान’को माग गरेका छन।
कलाकारहरूले प्रदेश र स्थानीय तहमा हाल गठन हुने प्रज्ञा प्रतिष्ठानहरूको ढाँचा ललितकलाको बृहत् मर्म समेट्न अपर्याप्त रहेको बताएका छन्। दृश्य कला र स्रष्टाहरूको स्वाभिमान जोगाउन अब उप्रान्त हरेक प्रदेश र स्थानीय तहमा स्वायत्त र पृथक् ‘ललितकला प्रज्ञा प्रतिष्ठान’ स्थापना गरिनुपर्ने उनीहरूको माग छ।
प्राज्ञ नगेन सिंह ठकुरी, शिव शिर्पाली र पार्वती अधिकारीद्वारा हस्ताक्षरित विज्ञप्तिमार्फत सम्पूर्ण ललितकलाकर्मी, कला-अनुरागी तथा संघ-संस्थालाई यस कानुनी एवं न्यायिक अभियानमा ऐक्यबद्धता जनाउन आह्वान गरिएको छ।
