काठमाडौं : सञ्चार तथा सूचना मन्त्रालयका सचिव डा. कमलप्रसाद पोखरेल र प्रधानमन्त्री तथा मन्त्रिपरिषद्को कार्यालयका सचिव बाबुराम अधिकारीले राजीनामा दिएका छन्। उनीहरूको राजीनामा मंगलबार बसेको मन्त्रिपरिषद् बैठकले स्वीकृत गरेको छ ।
साउन १३ गते सञ्चार मन्त्रालयमा सरुवा भएका पोखरेलले दुई सातामै राजीनामा दिएका हुन्। उनको सेवा अवधि अझै करिब एक वर्ष बाँकी थियो। राष्ट्रिय तथ्याङ्क कार्यालयको प्रमुख तथ्याङ्क अधिकारीबाट सञ्चार मन्त्रालयमा सरुवा भएपछि असन्तुष्ट रहेका पोखरेलले राजीनामा दिएको बताइएको छ।
यस्तै, प्रधानमन्त्री तथा मन्त्रिपरिषद्को कार्यालयका सचिव अधिकारी आगामी भदौ ४ गते अनिवार्य अवकाशमा जाँदै थिए। उनले पनि राजीनामा दिएका हुन्। यसअघि सहसचिव तहसम्मका कर्मचारीले राजीनामा दिँदै आए पनि पछिल्लो समय सचिव तहका कर्मचारीले समेत राजीनामा दिन थालेका छन्।
सरकारले ५५ वर्ष उमेर पूरा गरेका र ३० वर्ष सेवा अवधि पूरा गरेका कर्मचारीलाई अनिवार्य अवकाश दिने व्यवस्थासहित संघीय निजामती सेवा विधेयकको मस्यौदा अघि बढाएपछि निजामती कर्मचारीमा राजीनामा दिने क्रम बढेको बताइएको छ।
सरकारी सेवाबाट बाहिरिने कर्मचारीको संख्या पछिल्लो समय बढ्दै गएको राष्ट्रिय किताबखानाको अभिलेखमा उल्लेख रहेको जनाइएको छ। अभिलेख अनुसार करिब एक दर्जन सहसचिव, तीन दर्जन उपसचिव तथा ठूलो संख्यामा अधिकृत र त्यसभन्दा तल्लो तहका कर्मचारीले राजीनामा दिएको दाबी गरिएको छ।
