पोखरा, माछापुच्छ्रे बैंक लिमिटेडले नेपाल सरकार अर्थ मन्त्रालय, आन्तरिक राजश्व विभागद्वारा सञ्चालन भईरहेको “करदाता प्रोत्साहन उपहार कार्यक्रम” लाई योगदान पुर्याउने उद्देश्यका साथ एमबीएलएम स्मार्ट मोबाइल बैकिङ एपमा ‘बिल जितौं सुविधा सञ्चालनमा ल्याएको छ । नेपाल सरकारको आर्थिक वर्ष २०८३/८४ को बजेट अनुसार आन्तरिक राजस्व विभागले बिल लिने संस्कृतिको विकास, डिजिटल भुक्तानीलाई प्रोत्साहन तथा कर प्रणालीलाई थप पारदर्शी बनाउने उद्देश्यले करदाता प्रोत्साहन उपहार कार्यक्रम सञ्चालन गरेको हो ।
यस कार्यक्रम अन्तर्गत योग्य उपभोक्ताहरूले नियमित लक्की ड्र मार्फत नगद पुरस्कार जित्ने अवसर प्राप्त गर्नेछन। नेपाल भित्र व्यक्तिगत प्रयोजनका लागि रु १ सयभन्दा बढी मूल्यका वस्तु वा सेवा खरिद गरी बैंकको मोबाइल बैंकिङ एपमार्फत बैंक वा वालेटको मर्च्यांट क्युआर मार्फत डिजिटल भुक्तानी गर्ने ग्राहकका योग्य कारोबारहरू स्वतःआन्तरिक राजस्व विभागको प्रणालीमा समावेश हुने भएकोले यसका लागि छुट्टै दर्ता गर्नुपर्ने आवश्यकता पर्दैन।
माछापुच्छ्रे बैंकका ग्राहकहरूले एमबीएलएम–स्मार्ट एपमा लगईन गरी बिल जितौं मेनुमा प्रवेश गरेपछि आइआरडी उपहार कार्यक्रमका लागि योग्य भएका कुल कारोबार संख्या, योग्य कारोबारहरूको विस्तृत विवरण तथा उपहार विजेता भएको अवस्थामा सम्बन्धित जानकारी एकै स्थानबाट सहज रूपमा हेर्न सकिने छ।
आन्तरिक राजस्व विभागले कार्यक्रम अन्तर्गत योग्य कारोबारहरूबाट नियमित रूपमा लक्की ड्र सञ्चालन गर्दै प्रत्येक दिन एक जना विजेतालाई कर कट्टी पश्चात रु. १ लाख तथा प्रत्येक १५ दिनमा एक जना बम्पर विजेतालाई रु. १० लाख पुरस्कार प्रदान गर्ने व्यवस्था गरेको छ। विभागको निर्णय अनुरुप माछापुच्छ्रे बैंकले आफ्ना सम्पूर्ण ग्राहकहरूलाई रु. १ सय भन्दा बढीको प्रत्येक खरिदमा मर्च्यांट क्युआर मार्फत डिजिटल भुक्तानी गर्न, अनिवार्य रूपमा प्यान वा भ्याट बिल लिन, बिल सुरक्षित राख्न तथा एमबीएलएम स्मार्टको बिल जितौं मेनु मार्फत आफ्नो योग्य कारोबार नियमित रूपमा जाँच गर्न अपिल गरेको छ।
माछापुच्छ्रे बैंकले डिजिटल बैंकिङलाई थप सहज, सुरक्षित तथा ग्राहक मैत्री बनाउँदै सरकारी डिजिटल भुक्तानी तथा कर सचेतना अभियानमा सहकार्य गर्न निरन्तर प्रतिबद्ध रहेकोले “डिजिटल भुक्तानी गरौँ, बिल लिऔँ, सुरक्षित राखौँ र रु. १० लाखसम्मको उपहार जित्ने अवसर नछुटाऔँ“ भन्ने सन्देश सहित कार्यक्रममा सक्रिय सहभागिता बन्न आन्फ्ना ग्राहकलाई आग्रह गरेको छ ।
