पोखरा, मिलेनियम ट्रेक व्यवस्थापन समितिले राष्ट्रिय समाचार समिति(रासस) गण्डकी प्रदेशका प्रमुख वासुदेव पौडेललाई मिलेनियम ट्रेक अवार्ड प्रदान गर्ने भएको छ । तनहुँको दुलेगौडाबाट स्यांग्जाको रामबाछा जोडिने मिलेनियम ट्रेक सन् २००० देखि औपचारिक रुपमा सञ्चालनमा आएको हो । नेपालको पहिलो मध्यपहाडी पदमार्गको रुपमा लिईने सोहि मिलेनियम ट्रेकको प्रबर्द्दनमा योगदान पुर्याएको भन्दै शनिबार काठमाडौंमा हुने सामारोहमा पौडेललाई अवार्ड प्रदान गरिने भएको हो ।
हिमाली एवम् पहाडी भू दृश्यहरू अवलोकन गर्दै बालकदेखि बृद्धसम्म सबै उमेर समूहका व्यक्तिले पदयात्रा गर्न सक्ने यस पदमार्गमा विभिन्न ऐतिहासिक कोट, दरबार, गुफा आदि रहेका छन । ६ रात ७ दिनको समयावधिमा पदयात्रा गर्न सकिने यो पदमार्ग चरा पर्यटनका लागि पनि आकर्षक गन्तव्य हो । तीन सय प्रजातिका चरा पाइने यस पदमार्गका ठाउँ ठाउँमा नेपालमा मात्रै पाइने चरा काँडे भ्याकुर प्रशस्त मात्रामा देख्न सकिन्छ ।
१५ हजार पाँच सय ५५ रुपैयाँ नगद सहित दोसल्ला र सम्मानपत्र सहित अवार्ड प्रदान गर्न गर्न लागिएको मिलेनियम ट्रेक व्यवस्थापन समितिका महासचिव हर्क गुरुङले गुरुकुल खबरलाई जानकारी दिए । अर्वाडका लागि एक लाख ११ हजार १११ रुपैयाँ अक्षयकोष राखिएको छ । यस अघि उक्त अवार्ड टान गण्डकी एवम् पोखरा पर्यटन परिषद्का पूर्व अध्यक्ष डम्बर केसीलाई प्रदान गरिएको थियो ।
पत्रकार पौडेल यस अघि बिभिन्न संघसंस्थाबाट पुरस्कृत तथा सम्मानित भैसकेका छन । बि.सं.२०६३ सालदेखि राससमा आवद्ध पौडेलले त्यस अघि अन्य विभिन्न संचारमाध्यममा संलग्न रहेर काम गरेका थिए । पौडेल पोखराका पर्यटन सम्बद्ध संघ संस्थाहरूको छाता संगठन पोखरा पर्यटन परिषद्का प्रेस सल्लाहाकार समेत हुन ।
