पोखरा, कास्की जिल्लाको बिभिन्न स्थानमा प्रहरीले शुरु गरेको स्विप अपरेसनले दोश्रो दिन पनि निरन्तरता पाएको छ। बुधबार बेलुका ९ बजेदेखि बिहिबार बिहान ६ बजेसम्म संचालन गरिएको स्विप अपरेसन बिहिबार बेलुका ९ बजेबाट शुक्रबार बिहान ६ बजेसम्म पनि संचालन गरिएको थियो पहिलो दिन १ सय २२ जनालाई नियन्त्रणमा लिएको प्रहरीले दोश्रो दिन आज थप ६१ जनालाई नियन्त्रणमा लिएको जनाएको छ ।

लागू औषधको सेवन तथा बिक्री वितरण गर्ने, समाजमा अशान्ति फैलाउन गुण्डागर्दी गर्ने लगायतका गतिविधि नियन्त्रणका लागि प्रहरीले ‘स्वीप अप्रेसन’ चलाएको जनाएको छ। गएराती गरिएको अपरेसनको क्रममा पोखरा महानगरपालिका वडा नम्बर २ र ४ अन्तर्गतको मोहरियाटोल र गैह्रापाटन क्षेत्रबाट १४ जना, वडा नम्बर ६ को लेकसाइड र ड्यामसाइड क्षेत्रबाट २४ जना, वडा नम्बर ८ र ९ मा पर्ने बगालेटोल, सभागृह चोक, शिवालय चोक र पृथ्वीचोक क्षेत्रबाट ८ जना पक्राउ परेका छन् ।

यसैगरी पोखराको वडा नम्बर १३ र १५ को काँहुडाँडा, काँहुखोला र रामबजार क्षेत्रबाट २ जना, वडा नम्बर १८ र २० को सराङकोट, लामागाउँ र भलाम क्षेत्रबाट ४ जना, वडा नम्बर २६, २७, २९ र ३० अन्तर्गतका सुन्दरबजार, रिठेपानी, सैनिक बस्ती, खुदीखोला र साहुको खोर क्षेत्रबाट ९ जनालाई पक्राउ गरिएको प्रहरीको भनाई छ ।

समाजमा अशान्ति फैलाउने, टोले गुण्डाका रूपमा धम्की दिने, मादक पदार्थ सेवन गरी होहल्ला गर्ने र रातको समयमा शंकास्पद रूपमा हिँडडुल गर्नेहरूलाई नियन्त्रणमा लिई आवश्यक अनुसन्धान तथा कारबाही प्रक्रिया अगाडि बढाइएको कास्की प्रहरीका सुचना अधिकारी एबम प्रहरी निरिक्षक गणेश पाण्डेले गुरुकुल खबरलाई जानकारी दिए ।

यस अघि पक्राउ परेका १ सय २२ जनामध्ये ८ जनालाई लागू औषधसम्बन्धी कसूरमा म्याद थप गरी अनुसन्धान अगाडि बढाइएको छ भने सार्वजनिक हित, स्वास्थ्य, सुरक्षा, सुविधा र नैतिकता विरुद्धको कसूरमा २७ जनामाथि म्याद थप गरी अनुसन्धान भइरहेको छ । १५ जनालाई जिल्ला प्रशासन कार्यालय कास्कीबाट जरिवाना गरी छाडिएको र बाँकी ७० जनालाई सम्झाई–बुझाई गरी आफन्तको जिम्मा लगाएर छाडिएको छ । अन्य २ जनालाई भने हाल होल्डमा राखिएको प्रहरीले जनाएको छ । प्रहरीका अनुसार यो अभियानलाई आबश्यकता अनुसार निरन्तरता दिईने छ।