काठमाडौँ,  राष्ट्रिय स्वतन्त्र पार्टीका सभापति रवि लामिछानेले पार्टीबाट निर्बाचित सांसदहरुलाई सार्वजनिक अभिव्यक्ति दिँदा जिम्मेवार र संयमित हुन निर्देशन दिएका छन् । ललितपुरस्थित एक होटलमा पार्टीका नबनिर्बाचित सांसदहरुको लागि आयोजित अभिमुखीकारण कार्यक्रममा बोल्दै सभापति लामिछानेले सांसदहरू अब सामान्य अभियन्ता वा पेशाकर्मी मात्र नभई जनप्रतिनिधि भैसकेकोले पदीय गरिमा कायम हुने गरि अभिव्यक्ति दिनुपर्नेमा जोड दिए ।

‘जथाभावी अभिव्यक्ति दिने वा मनोरञ्जनको रुपमा तथा हल्काफुल्का रूपमा प्रस्तुत हुने छुट कसैलाई पनि छैन, मलाई पनि छैन।’ लामिछानेले भने, ‘भोट दिएका जनताको शिर झुक्ने काम कुनै पनि अभिव्यक्ति वा क्रियाकलापबाट हुनुहुँदैन।’ उनले सरकार बनेको दिनदेखि नै सरकार ढाल्न एउटा समूह लाग्ने गरेको बताउँदै आफूहरूभित्र फाटो ल्याउन खोज्नेहरूको बिगबिगी भएको दाबि गरे ।

सभापति लामिछानेले भने, ‘हामी मिल्न सकेनौं भने र स्वार्थको बन्दी बन्यौं भने मात्रै समस्या हुन्छ।’ उनले अन्य दलहरूबाट रास्वपामा आएका निर्वाचितहरूलाई पनि पुराना दलबाट टाढा बस्नुपर्ने बताए।  उनले जनताले मत दिएपछि सबैको भूमिका फेरिएको बताउँदै मत दिएका जनतालाई प्रभावित हुनेगरी काम गर्नुपर्ने बताए। उनले निर्वाचित सबैलाई सकेसम्म सरकारी अस्पतालमा उपचार गराउनुपर्ने पनि बताए।

उनले कुन धाराले कहाँ के काम अड्किएको छ भनेर निर्वाचितहरूले थाहा पाउनुपर्ने बताउँदै भने, ‘कहाँ कसलाई भनेर हुन्छ भनेर दौडधुप नगर्नुहोला।’ उनले कुनै बहाना गर्न नपाउनेगरी जनताले आफूहरूलाई जिताएर पठाएको भन्दै आफूहरू सचेत हुनुपर्ने बताए। सभापति लामिछानेले पार्टीको विगतबारे चर्चा गर्दै पार्टी जन्मे देखि प्रहार भैरहेको, पार्टीको नाममा मुद्दा चलाइएको, पार्टीको चुनाव चिन्हमा मुद्दा चलेको अबस्थामा पनि विभिन्न स्वार्थ समूह र पुराना दलबाट पार्टी जोगाएर ल्याउन सफल भएको दाबि गरे।