काठमाडौँ, प्रेस काउन्सिल नेपालले निरन्तर ५० वर्षसम्म प्रकाशन भएका पत्रपत्रिकालाई ‘प्रेस काउन्सिल सम्मान’ प्रदान गर्ने भएको छ । धादिङ जिल्लाको सल्यानटारमा हालै सम्पन्न काउन्सिलको बोर्ड बैठकले ‘निरन्तर ५० वर्षसम्म प्रकाशन भएका पत्रपत्रिकालाई ‘प्रेस काउन्सिल सम्मान’ प्रदान गर्ने’ निर्णय गरेको काउन्सिलका वरिष्ठ प्रशासकीय अधिकृत (प्रवक्ता) दीपक खनालद्वारा बिहीबार जारी प्रेस विज्ञप्तिमा जनाइएको छ ।

विज्ञप्तिमा काउन्सिलद्वारा प्रदान गरिने विभिन्न पुरस्कारलाई थप पारदर्शी, प्रभावकारी बनाउन पुरस्कारसम्बन्धी कार्यविधिमा सुधार एबम परिमार्जन गर्ने निर्णय भएको उल्लेख छ । बोर्डका निर्णय सार्वजनिक गर्दै विज्ञप्तिमा भनिएको छ, ‘बैठकमा यसै आर्थिक वर्षको हालसम्मको कार्यक्रम, प्रगति, थप कार्यक्रमसहित निर्वाचन आचारसंहिता र आमसञ्चार क्षेत्रका समसामयिक विषयमा छलफल भयो ।’

निर्वाचन आचारसंहिता जागरण अभियान धादिङबाट शुभारम्भ गर्ने गरी काउन्सिल बैठकले विभिन्न निर्णय गरेको काउन्सिलका सदस्य बालकृष्ण अधिकारीले गुरुकुल खबरलाई जानकारी दिए । पहिलोचरणमा सात प्रदेशका प्रमुख सहरमा निर्वाचन आचारसंहिता र मिडिया विषयक कार्यक्रम सञ्चालन गर्ने तथा अनुगमनलाई थप प्रभावकारी बनाउने निर्णय भएको काउन्सिलले जनाएको छ ।

बोर्ड बैठकले आगामी फागुन २१ मा हुने प्रतिनिधि–सभा सदस्य निर्वाचनलाई स्वतन्त्र, स्वच्छ, निष्पक्ष, पारदर्शी तथा भयमुक्त वातावरणमा सम्पन्न गर्न निर्वाचन आचारसंहिता पूर्णरूपमा कार्यान्वयन गर्न, गराउन सम्बन्धित सबैमा अपिल गर्ने निर्णय समेत गरेको छ ।

बैठक पश्चात् माघ १८ गते धादिङबेसीमा विभिन्न कार्यालयका प्रमुख एवं प्रतिनिधि, स्थानीय शैक्षिक एवं सामाजिक सङ्घसंस्थाका प्रतिनिधि, पत्रकार तथा बुद्धिजीवीहरूको सहभागितामा ‘निर्वाचन आचारसंहिता र मिडिया विषयक अन्तरक्रिया कार्यक्रम’ समेत सफलतापूर्वक सम्पन्न भएको काउन्सिलले जनाएको छ ।