पोखरा, नेपाली कांग्रेसले असोज ३ गते शुक्रबार संविधान दिवसको अबसरमा खबरदारी र जागरणसभा गर्ने भएको छ । पार्टी केन्द्रीय कार्यालयले निर्णय गरेर पार्टीका जिल्ला समिति र भ्रातृसंस्थाको आयोजनामा मुलुकभर खबरदारी र जागरण सभा गर्न निर्देशन दिएको हो ।
नेपाली कांग्रेसको केन्द्रीय सूचना संचार तथा प्रचार विभागका प्रमुख मीनबहादुर विश्वकर्माले असोज ३ गते संविधान दिवसका दिन खबरदारी र जागरणसभा गर्ने निर्णय केन्द्रीय समितिले गरेको भन्दै उक्त कार्यक्रम पार्टीका जिल्ला समिति र भ्रातृसंस्थाले आयोजना गर्ने जानकारी दिए ।
गत भदौ २७ गते राष्ट्रपति रामचन्द्र पौडेलले पूर्वप्रधानन्यायाधीश सुशीला कार्कीलाई संविधानको प्रावधान बाहिरबाट प्रधानमन्त्री नियुक्त गरेपछि औपचारिक रूपमा असहमति जनाएको कांग्रेसले संविधान दिवसका दिन खबरदारीसभा गर्न लागेको हो ।
प्रचार बिभाग प्रमुख बिश्वकर्माले पार्टीका जिल्ला समितिले गोष्ठी, शान्तिपूर्ण प्रदर्शन र अन्तरक्रिया गर्ने जानकारी दिए । संविधानको संरक्षण र पालनामा दबाब दिन त्यस्ता कार्यक्रम आयोजना गरिएको उनले बताए ।
