पोखरा, युनाइटेड रेफरेन्स ल्याबोरेटरी प्रालि(युआरएल)ले शनिबार पोखराका बिभिन्न दुई स्थानमा आयोजना गरेको शिविरमा करिब चार सय जनाको रक्त परीक्षण निशुल्क गरिएको छ ।
सहयात्री बचत तथा ऋण सहकारीको साधारणसभाको सन्दर्भमा आयोजना गरिएको शिविरमा २ सय ५ जनाको मधुमेह र रगतमा हुने खराब बोसो (टिजी) सम्बन्धी जाँच निशुल्क गरिएको हो ।
यस्तै, नवीन बचत तथा ऋण सहकारीको १९ औं साधारणसभाको सन्दर्भमा आयोजित शिविरमा १ सय ८० जनाको रक्त परीक्षण गरिएको छ । शिविरमा थाइराइड (टिएसएच) र क्रेटिनाइन (मिर्गाैला सम्बन्धी रक्तजाँच) समेत निशुल्क गरिएको थियो ।
१२ वर्षअघि पोखरामा स्थापना भएको युआरएल गण्डकी प्रदेशको एकमात्र आइएसओ प्रमाणित रेफरेन्स ल्याब हो ।
युआरएल अध्यक्ष ठाकुरप्रसाद पन्थले १२ वर्षको अवधिमा युआरएल आफैं र विभिन्न संघ, संस्थासँग सहकार्य गरी २ सय ९ निशुल्क स्वास्थ्य शिविर आयोजना गरिएको जानकारी दिए। यो अवधिमा साढे ३ लाख जनाले शिविरबाट निशुल्क रगत जाँच सुविधा लिएको उनले बताए ।
