पोखरा, पोखरामा जारी श्री गण्डकी शतकुण्डीय गायत्री कोटिहोम विराट ज्ञानमहायज्ञमा मंगलबार महानायक राजेश हमाल समेत सहभागी भए । महानायक हमालले नाच्दै गर्दा उनलाई छैटौँ भ्वाइस अफ नेपालका विजेता प्रशेष पाण्डेले साथ दिएका थिए । पाण्डेको गीतमा महानायक हमालसँगै कोटिहोमका संकल्पकर्ता बालयोगेश्वर श्रीविजय कृष्णमूर्तिजी महाराजजी र भक्तजन पनि नाचेका थिए ।

कोटीहोममा महानायक राजेश हमालको सहभागिताले आफूहरु निकै निकै उत्साहित भएको महायज्ञका संकल्पकर्ता बिजयकृष्ण मुर्तीले बताए। उनले गण्डकीको कोटीहोम निकै सफल भएको दावी गर्दै अन्य प्रदेशमा पनि कोटीहोम गर्ने बताए ।

त्यस अबसरमा महानायक हमालले कोटीहोममा उपस्थिति जनाउने मौका दिएकोमा आयोजकप्रति आभार व्यक्त गरे । कोटिहोम दर्शन गर्दै गर्दा उपस्थित भक्तजन समेत उत्साहित भएको पाएको भन्दै उनले सत्मार्गतर्फ लाग्न सके जीवनले सार्थकता पाउने बिचार ब्यक्त गरे । गण्डकी कोटीहोम साच्चिकै ऐतिहासिक रहेको भन्दै उनले जीवनलाई आनन्दित बनाउन यस्ता खालका कोटिहोम आवश्यक रहेको बताए ।

कोटीहोममा भागवत मञ्जरी राधिका दासीको प्रवचन सुन्न मंगलबार पनि भक्तजन उल्लेखनीय रुपमा सहभागी बनेका थिए । पटकपटकको वर्षा तथा सार्वजनिक यातायात बन्द हुँदासमेत हजारौंको संख्यामा भक्तजनहरु कोटीहोममा सहभागी भएको भन्दै आयोजकले खुसि प्रकट गरेका छन ।

शनिबारदेखि श्रीमद्देवी भागवत प्रवचन शुरु गरेकी राधिका दासीले जेठ २६ गतेसम्म प्रवचन दिनेछिन् । राधिका दासीले अलौकिक शहरमा भएको कोटीहोमले निकै ठूलो महत्व राख्ने बताइन् । उनले भनिन्, ‘मुक्तिनाथलाई शिरमा, गुप्तेश्वरलाई समीपमा, ताल बाराही माताको काँखमा बसेर दिनहुँ करोड हवन चलिरहेको ठाउँमा बसेर श्रीमद्भागवत कथा सुन्न पाउनु हामी सबैको अहोभाग्य हो ।’ यस्तो पुण्य अवसर कहीँ, कहिल्यै नआउने उनको जिकिर छ ।

कोटीहोममा जेठ २४ गते १ करोड दीप प्रज्ज्वलन गर्ने कार्यक्रम रहेको र एक सय कुण्डमा प्रयोग भएका इँटा लैजान चाहनेललाई सम्पर्क गर्न आग्रह गरिएको छ ।