पोखरा, यती एयरलाइन्सले नोभेम्बर्र १२ अर्थात मंगलबारदेखि दैनिक रुपमा पोखरा – भैरहवा–पोखराको उडान सुरु गरेको जनाएको छ। प्रतिकुल मौसमका कारण समयमा केहि तलमाथि हुने भएपनि हरेक दिन बिहान भैरहवाबाट पोखराको उडान ११ बजेर ५ मिनटमा हुने र पोखराबाट भैरहवाको उडान बिहान ११ बजेर ४५ बजे हुने गरि तय गरिएको बुझिएको छ।
यति एअरका पोखरा स्टेसन इन्चार्ज रामु लामिछानेले गुरुकुल खबरलाई जानकारी दिए अनुसार हाललाई पोखरा – भैरहवाको एकतर्फी हवाई भाडा २ हजार ५ सय रुपैयाँ कायम गरिएको छ।
यती एयरको यो निर्णय संगै पोखराबाट भैरहवा हुँदै गौतमबुद्ध अन्तर्राष्ट्रिय विमानस्थलमार्फत नेपाल बाहिर उडान गर्ने यात्रुहरु र विभिन्न अन्तराष्ट्रिय उडानबाट भैरहवा अवतरण गरेका यात्रुहरुलाई पोखरा र आसपासका क्षेत्रमा आउन सजिलो हुने भएको छ।
गौतमबुद्ध अन्तर्राष्ट्रिय विमानस्थलमा यात्रुहरुको संख्या वृद्धि गर्न टेवा पुर्याउने उद्देश्यले पोखरा – भैरहवा–पोखरा प्रत्यक्ष उडान सुरु गरेको यती एयरलाइन्सले जानकारी दिएको छ।
