पोखरा, कुश्माको तमादी खोलाले शनिबार साँझ टाटा सुमो जीप जीप बगाउँदा वेपत्ता भएका तीन जना मध्ये एक जनाको शव भेटिएको छ । रुपन्देही तिलोत्तमा नगरपालिका ९ का ३४ वर्षीय गोपाल बस्नेतको शव फेला परेको हो । वेपत्ता जीप पनि भेटिएको जिल्ला प्रहरी कार्यालय पर्वतले जनाएको छ ।
खोलाको झण्डै ३ सय मिटर तल जीपका पार्ट्सहरु छरिएको अवस्थामा भेटिएको र जीपको मुख्य भाग बाढिले पुरिएको अवस्थामा फेला परेको जनाइएको छ । वेपत्ता अन्य २ जनाको खोजी भैरहेको छ ।
ड्राइभरले गाडी रोकेर ढुंगा पन्छाउने क्रममा माथिबाट आएको ढुंगा र माटोले जीप बगाएको पर्वतका प्रहरी प्रमुख डिएसपी खुमलाल भुसालले जानकारी दिए । बेपत्ता भएकामध्ये एक जना पोखरा नाउडाँडाका विजय भनिने माधव पौडेल रहेका र अर्का एक जनाको परिचय नखुलेको जिल्ला प्रहरी कार्यालय पर्वतका इन्स्पेक्टर एवम् सूचना अधिकारी केशव केसीले जानकारी दिए ।
चार जना सवार उक्त जीपमा ड्राइभर भने हामफालेर बाँच्न सफल भएको बताइएको छ ।
