पोखरा। नेपाली कांग्रेसको भातृसंस्था नेपाल महिला संघको पोखरा नगर कास्कीको सभापतिमा अम्बिका ढुङ्गाना चयन भएकी छिन् ।
नेपाल महिला संघको विधान, २०५८ को धारा ३८ र ४१ अनुसार सांगठनिक सुदृढिकरणमा पुर्याएको योगदानको कदर गर्दै सभापति पदमा मनोनित गरिएको पत्रमा उल्लेख छ ।
नेपाल महिला संघ कास्कीका सभापति मिना पाण्डेले हस्ताक्षर गरी दिइएको पत्रमा नगर सभापतिमा ढुङ्गानालाई संघको सांगठनिक सुदृढिकरणमा पुर्याएको योगदानको उच्च कदर गर्दै जिम्मेवारी सुम्पिएको उल्लेख छ ।
बाँकी सदस्यहरुको भने संघले पछि मनोनयन गर्नेछ ।
नयाँ जिम्मेवारी सम्हाल्दै सभापति ढुङ्गानाले वर्तमान अवस्थामा राजनीतिप्रति बढ्दो वितृष्णालाई मेटाउन राजनीतिमा महिला सहभागिता जगाउन र सचेत बनाउने अभियानमा खटिने र पार्टीको आवश्यकता अनुसार हरेक जिम्मेवारी निर्वाह गर्ने बताईन् ।
सभापति ढुङ्गानाले भनिन् ‘हिजो प्रजातन्त्र स्थापनाको एजेण्डामा होस् वा आज लोकतन्त्रको रक्षाका खातिर होस्, नेपाल महिला संघको योगदान अतुलनीय र ऐतिहासिक छ । यसको गरिमालाई उच्च राख्ने गरी संगठनप्रति वफादार भएर अघि बढ्नेछु ।’
