काठमाडौं । शैक्षिक परामर्श संघ (इक्यान)को आसन्न अधिवेशनमा अध्यक्षका उम्मेदवार शेषराज भट्टराईको समूहबाट उपाध्यक्षमा गीता सिवाकोटी (गीताञ्जली)ले उम्मेदवारी दिने भएकी छिन् ।
कास्की इक्यानको कोषाध्यक्ष हुँदै केन्द्रमा आएकी सिवाकोटीले सामाजिक सञ्जालमार्फत उम्मेदवारी घोषणा गरेकी हुन् । प्रष्ट दृष्ट्रिकोण र प्रभावकारी योजना बनाउन सक्ने खुबी भएकी उनले संस्थाको थप उन्नयनका लागि आफूले उम्मेदवारी दिने तयारी गरेको बताइन् ।
देशको शैक्षिक विकासमा महत्वपूर्ण योगदान पुर्याएको इक्यानलाई राज्यले आवश्यक सम्बोधन गर्न सकेको छैन’, गीताले भनिन्, ‘इक्यानलाई राज्यकै अंगको हिसाबमा विकास गर्न जरुरी छ । त्यसकै लागि मैले उम्मेदवारी घोषणा गरेकी हुँ ।’
सिवाकोटीलाई इक्यानभित्र निकै सशक्त प्रतिस्पर्धीका रुपमा लिइन्छ । सिवाकोटीसँगै अध्यक्षका उम्मेदवार भट्टराईको समूहबाट अन्य पaदाधिकारीमा पनि सशक्त उम्मेदवारहरु मैदानमा उत्रँदैछन् ।
नयाँ नेतृत्व चयनका लागि शनिबार काठमाडौंमा इक्यानको अधिवेशन हुँदै छ । इक्यानको अध्यक्षका लागि अहिलेका उपाध्यक्ष शेषराज भट्टराईले यसअघि नै उम्मेदवारी घोषणा गरिसकेका छन् ।
इक्यानलाई कुशल नेतृत्वसँगै नीतिगत हिसाबमा शक्तिशाली बनाउनका लागि आफूले उम्मेदवारी घोषणा गरेको भट्टराईको भनाइ छ ।
