पोखरा । नेपाल लोकतन्त्रवादी आदिबासी जनजाति महासंघ जिल्ला कार्य समिति कास्कीले गण्डकी प्रदेशका नवनियुक्त उर्जा, जलस्रोत तथा खानेपानी मन्त्री सरस्वती अर्याल तिवारीलाई भेट गरी बधाई दिनुका साथै सफल कार्यकालको शुभकामना व्यक्त गरेको छ ।
महासंघ कास्कीका सभापति आशबहादुर गुरुङको नेतृत्वमा गएको टोलीले मन्त्री तिवारीको सफल कार्यकालको शुभकामना व्यक्त गरेको हो ।
महासंघका टोलीसंग साक्षात्कार गर्दै उर्जा, जलस्रोत तथा खानेपानी मन्त्री तिवारीले आफ्नो कार्यकालमा गण्डकी प्रदेशबासीले समृद्वि र पारदर्शी सेवाको अनुभुत गर्न पाउने विश्वास दिलाउदै प्रदेश सरकारले लिएको एक घर एक धारा कार्यक्रमले प्रदेशबासीको खानेपानी समस्या समाधान हुने दावी गरिन् । ‘प्रदेश सरकारको एक घर एक धारा कार्यक्रम सफल रुपमा सम्पन्न हुनेमा हामी विश्वस्त छौं’ मन्त्री तिवारीले भनिन् ।
बधाई ज्ञापनका क्रममा बोल्दै महासंघ कास्की सभापति गुरुङले मन्त्री तिवारीलाई गण्डकी प्रदेशको विकासमा गम्भीर हुन आग्रह गर्दै प्रदेश सरकारले विकास नीतिमा केन्द्रीत रहेर कार्य गर्ने विश्वास व्यक्त गरे ।
महासंघका उपसभापति चन्द्र प्रकाश थापा मगरले मन्त्री तिवारीको सफल कार्यकालको कामना गर्दै मुलुकको मुलधारबाट पछाडि परीरहेका आदिबासी जनजातिको बस्तीमा पनि विकासका कार्यहरु संचालन गर्न सुझाव दिए ।
कार्यक्रममा महासंघ कास्कीका पदाधिकारी तथा कार्य समिति सदस्यहरुको उपस्थिति रहेको थियो ।
