पोखरा,  पोखरामा जारी दोस्रो मनुश्री ̸ भिग्नजित अन्तर्राष्ट्रिय जुनियर टेनिस प्रतियोगितामा राजबिर प्रधान, सुनिरा थापा र ब्रिजेश अर्यालले उपाधि जितेका छन् ।

कास्की जिल्ला टेनिस संघको आयोजनामा उक्त प्रतियोगिता पोखरा रंगशालास्थित टेनिस कोर्टमा बिहिबार सम्पन्न यू–१६ उमेर समुहमा ब्वाइजतर्फ राजबिर, गल्र्सतर्फ सुनिरा तथा यू १४ ब्वाइजतर्फ ब्रिजेशले फाइनल खेल जित्दै पदक जितेका हुन् ।

प्रतियोगिता अन्तर्गत सम्पन्न यू–१६ ब्वाइजतर्फको फाइनलमा राजबिर प्रधानले आयुष्मान हजुर घलेलाई सोझो २–० को सेटमा पराजित गर्दै उपाधि जितेका हुन् । पहिलो र दोश्रो सेट समान ६–२, ६–२ ले पराजित गर्दै उपाधि जित्दा सोही उमेर समुहको गल्र्सतर्फ सुनिरा थापाले श्वस्तिका बज्रचार्यलाई ६–२, ६–२ ले पराजित गर्दैै उपाधि जितिन् ।

उपाधि संगै राजबिर र सुनिराले समान नगद जनही रु १५ हजारका साथमा मेडल र उपविजेता बनेका आयुष्मान र श्वस्तिाकाले जनही नगद ७ हजार ५ सयका साथमा मेडल, प्रमाणपत्र प्राप्त गरेको टुर्नामेण्ट डाइरेक्टर राजन पौडेलले जानकारी दिएका छन् ।

त्यस्तै यू १४ ब्वाइजतर्फ भएको फाइनल खेल ब्रिजेशले जितेका छन् । फाइनल खेलमा बोरिश अधिकारी रिटायर्ड हर्ट हुँदै मैदान छोडेका थिए । पहिलो सेट ६–३ ले जितेका ब्रिजेशले दोश्रो सेट चलिरहँदा बोरिश रिटायर्ड हर्ट हुँदै मैदान छोडेका थिए । ब्रिजेशले उपाधि सहित नगद रु १२ हजार, उपबिजेता बनेका बोरिशले नगद रु ६ हजारसहित मेडल प्राप्त गरेका छन् ।

कुल १४ वटा इभेन्ट मध्ये यू–१४ र यू–१६ का खेलहरु सम्पन्न भएका छन् भने बिहिबारबाट यू–८, यू–९, यू–१०, यू–१२ का पहिलो चरणका खेलहरु सुरु भएका छन् ।

प्रतियोगिता अन्तर्गत बिहिबार सम्पन्न यू ९ ब्वाइज सिंगल्स सोरा पराजुलीले बेदान्त चालिसेलाई ४–१, ४–२ ले, इभान भट्टराइले आदित्य केसीलाई ४–२, ४–१ ले, अर्याश राज पौडेलले इलेश गौतमलाई ४–०, ४–० को सोझो सेटमा पराजित गरेका छन् । त्यस्तै यू–१२ तर्फ स्पन्दन उदाशले विश्वबिर डल्लाकोटीलाई ६–०, ६–० ले, सन्दिप विकले काई प्रजापतीलाई ६–०, ६–० को सोझो सेटमा पाखा लगाए । त्यसै गरी यु–८ ब्वाइज सिंगल्समा जिवश भट्टराई र यू–९ ब्वाइजमा सुभन केसीले आ–आफ्नो खेल जितेका छन् ।

प्रतियोगितामा यू–८, यू–९, यू–१०, यू–१२, यू–१४ र यू–१६ ब्वाइज तथा गल्र्स सिंगल्सका साथै ओपन ब्वाईज तथा गल्र्स डबल्स गरी विभिन्न १४ ईभेन्टमा प्रतिस्पर्धा भइरहेको छ । जुनियरतर्फ यू–८, यू–९ र यू–१०, ब्वाईज तथा गल्र्स सिंगल्स बिजेता तथा उपबिजेताले गिफ्ट ह्याम्पर तथा मेडल प्राप्त गर्ने छन् भने यू–१२ ब्वाईज तथा गल्र्स सिंगल्स बिजेताले जनही नगद रु ८ हजार तथा उपबिजेताले जनही नगद रु ५ हजार सहित मेडल प्राप्त गर्ने प्रतियोगिताकी संयोजक प्रिती बरालले जानकारी दिएकी छन् ।

त्यस्तै यू–१४ ब्वाईज तथा गल्र्स सिंगल्स बिजेताले समान जनही नगद रु १२ हजार, उपबिजेताले समान जनही नगद रु ६ हजारसहित मेडल प्राप्त गर्ने छन । यू–१६ ब्वाईज तथा गल्र्स सिंगल्स बिजेताले समान जनही नगद रु १५ हजार उपबिजेताले समान जनही नगद रु ७ हजार ५ सय तथा ब्वाईज तथा गल्र्स ओपन डबल्सतर्फ बिजेताले समान जनही नगद रु १५ हजार उपबिजेताले समान जनही नगद रु ७ हजार ५ सयसहित मेडल प्राप्त गर्ने संयोजक बरालले जानकारी दिएकी छन् ।

प्रतियोगितामा ३७ जना खेलाडीहरुको सहभागिता रहेको प्रतियोगितामा गल्र्सतर्फ १५ र ब्वाइजतर्फ २२ खेलाडीहरुको सहभागिता रहेको छ ।