पोखरा । आसन्न प्रतिनिधिसभा निर्वाचनमा कास्की क्षेत्र नम्बर २ मा नेकपा एसले श्रीनाथ बराललाई उठाउने भएको छ । बरालको क्षेत्र कास्की १ भए पनि पाँच दलीय गठबन्धनबाट उनलाई कास्की २ मा उठाउन लागिएको हो ।
यहाँ क्षेत्रबाट नेकपा एसको उम्मेदवार बन्न तुलबहादुर गुरुङ, शिवजी गुरुङ, मदन आचार्य, दाताराम आचार्य, झपिन्द्रराज रेग्मी, शिवराज आचार्य, शर्मिला पौडेलको नाम केन्द्रमा सिफारिस भएको थियो ।
बरालको नाम क्षेत्र १ बाट सिफारिस गरिए पनि कास्की २ नेकपा एसले पाउने भएपछि उनी टिकटको रेसमा थिए ।
कास्की १ कांग्रेसको भागमा परेपछि बराल कास्की २ मा गएर चुनाव लड्न लागेका हुन् । प्रतिनिधि सभा सदस्यका लागि कास्की क्षेत्र नम्बर २ मा नेकपा एमालेका केन्द्रीय सदस्य विद्या भट्टराईसँग प्रतिस्पर्धा गर्नेछन् ।
गठबन्धनमा एकीकृत समाजवादीको भागमा परेपछि एकीकृत समाजवादीले बराललाई उमेद्वार बनाउने भएका छ । त्यसैगरी एमालेले भट्टराईलाई उमेद्वार बनाएको छ । भट्टराई कास्की क्षेत्र नम्बर २ बाट निवर्तमान प्रतिनिधि सभा सदस्य हुन् ।
एमाले नेता रवीन्द्र अधिकारी निर्वाचन लढ्दै आएको क्षेत्र नम्बर २ मा अधिकारीको हेलिकप्टर दुर्घटनामा परि निधन पछि उनकी जीवन संगिनी भट्टराईले उपनिर्वाचनमा विजयी हासिल गरेकी थिइन् ।
२०७६ सालमा भएको उपनिर्वाचनमा भट्टराईले नेपाली काग्रेसका उमेद्वार खेमराज पौडेललाई ८ हजार ४ सय ३ मतले हराएकी थिइन् । भट्टराईले २४ हजार ३ सय ९४ मत ल्याउदा पौडेलले १५ हजार ९ सय ९१ मत प्राप्त गरेका थिए ।
क्षेत्र परिवर्तन गरेर कास्की २ मा उम्मेदवार बनेका बराल क्षेत्र छाड्नुले निर्वाचनमा आफूलाई असर नहुने बताउँछन् ।
‘मान्छेहरू जिल्ला नै छाडेर त लड्छन्, म यहीँ पोखरा महानगरकै हुँ । क्षेत्र बाँड्दा कुन वडा कता पर्छ, कता । यसले असर गर्दैन,’ उनले भने ।
कास्की १ भन्दा कास्की २ मा आफू बढी सक्रिय भएको र योगदान पनि बढी नै दिएको उनको दाबी छ । वडा फरक पर्दैमा कास्की २ मा आफूले गरेको योगदानलाई उपेक्षा गर्न नमिल्ने बरालको तर्क छ ।
‘कास्की २ का बाटामा मैले आन्दोलनमा रगत बगाएको छु, कास्की २ मै नजरबन्दमा परेको छु । कास्की २ मा पनि म उत्तिकै सक्रिय नै छु,’ बरालको दाबी छ ।
२०५४ सालमा कास्कीको जिल्ला विकास समितिको उपसभापति बनेका उनी ४० वर्षदेखि सक्रिय राजनीतिमा छन् । उनी विद्यार्थी राजनीति गरेर आएका नेता हुन् ।
२०४४ सालमा स्थानीय नेता तुलबहादुर गुरुङ लगायत पक्राउ परेपछि उनी पृथ्वीनारायण क्याम्पसमा १३ दिन अनशन बसेका थिए।
‘विद्यार्थी राजनीतिबाट म माथि आएको हुँ, मण्डलेका विरुद्ध ४४ सालमा १३ दिन अनशन बसेँ,’ बरालले भने । बराल समाजशास्त्रमा स्नातकोत्तर हुन् ।
प्रतिक्रिया लेख्नुहोस्:-