काठमाडौं । क्रिकेटर सन्दीप लामिछाने विमानस्थलबाट नै पक्राउ परेका छन् ।
कतार एअरवेजको क्यूआर ६४८ नम्बरको विमानबाट आज नेपाल आइपुगेका लामछिानेलाई विमानस्थलबाटै नेपाल प्रहरीले पक्राउ गरेको हो ।
उनले नेपाल फर्केसँगै प्रहरीसँग आत्मसमर्पण गर्ने र कानूनी लडाइँ लड्ने बताएका थिए। क्रिकेट खेल्न केन्या पुगेका लामिछानेविरुद्ध गत भदौ २१ गते एक युवतीले जबरजस्ती करणीको जाहेरी प्रहरीसमक्ष दिएकी थिइन्।
प्रहरीले पक्राऊ पूर्जी जारी गरेपछि सन्दीप केन्याबाट व्यवसायिक क्रिकेट खेलका लागि वेष्ट इण्डिजतर्फ लागेका थिए। लामिछाने आज बिहान १० बजे कतार एयरवेजबाट काठमाडौं आइपुगेका हुन्।
लामिछानेलाई नेपाल प्रहरीले पक्राउ गरेर हत्कडी लगाएका थिए । आफै आत्मसर्मपण गरेको व्यक्तिलाई हत्कडी लगाउनु गलत भएको भन्दै उनका फ्यानहरुले सामाजिक सञ्जाल मार्फत विरोध गरिरहेका छन् ।
युवतीले प्रहरीसमक्ष दिएको जाहेरीमा सन्दीपले केन्या उड्नु अघिल्लो रात होटलमा बोलाएर जबरजस्ती करणी गरेको दाबी गरिएको छ।
