पोखरा । नेकपा एकीकृत समाजवादीका अध्यक्ष एवं पूर्व प्रधानमन्त्री माधवकुमार नेपालले संविधान र संघियताका लागि आगामी प्रतिनिधिसभा निर्वाचनसम्म अहिलेको सत्ता गठबन्धन कायमै रहने बताएका छन् ।

पुष्पलाल स्मृति प्रतिष्ठान कास्कीले ४४औं पुष्पलाल स्मृति दिवसका सन्दर्भमा सोमबार पोखरामा आयोजना गरेको विचार गोष्ठीमा अध्यक्ष नेपालले संविधान र संघीयता जोगाउन प्रतिनिधि सभाको निर्वाचनसम्म पाँच दलीय गठबन्धन कायमै रहने बताएका हुन् । ‘प्रतिगमन रोक्नका लागि पनि आगामी प्रतिनिधिसभा निर्वाचनसम्म नै गठबन्धन कायमै कायम रहन्छ ।’ उनले भने ।

अध्यक्ष नेपालले निर्वाचनमा दलबीच सिटको बाँडफाँट भने सम्मानजनक हुनपर्नेमा जोड दिएका छन् । ‘निर्वाचनमा जम्मै सिट आफू लिउँला, उर्घिएको मात्र दिउँला भनेर कुनै पार्टी विशेषले सोच्छ भने हामी टुलुटुलु हेर्ने वाला छैनौं’ अध्यक्ष नेपालले भने ‘आफ्नो शक्तिमा भरोसा गरेर अघि बढ्नेछौं ।’

पुष्पलालले अवलम्बन गरेको बाटोमा कहिल्यै पनि खोट नभएको बताउँदै अध्यक्ष नेपालले उनकै विचारबाट निर्देशित कम्युनिस्ट पार्टीले जनतामा प्रभाव जमाउन सक्षम भएको विश्वास व्यक्त गरे । पुष्पलालकै विचारले जनताको विश्वास जित्न सफल भएको र नेपालमा कम्युनिस्ट जनमत बलियो बनेको उल्लेख गरे ।

कम्युनिस्ट आन्दोलनलाई सशक्त बनाउँदै राष्ट्रियता, लोकतन्त्र, सामाजिक न्याय, समानताको आवाजलाई बुलन्द पार्न पुष्पलालका अनुयायीले उनीबाट प्रेरणा प्राप्त गर्दै अघि बढ्न सक्नुपर्नेमा उनले जोड दिए ।