काठमाडौँ — मुग्लिन-नारायणगढ सडकखण्डस्थित १५ किलो भन्ने ठाउँमा गुडिरहेको ग्यास बुलेटमा आगलागी हुँदा सडक अवरुद्ध भएको छ ।

शुक्रबार दिउँसो गुडिरहेको ग्यास बुलेटमा आगलागी भएको वाग्मती प्रदेश प्रहरी ट्राफिक कार्यालय रामनगर चितवनका एसपी सुशील सिंह राठौरले जानकारी दिए । आगलागीका कारण सडकमा ठूलो संख्यामा सवारी साधन बीच सडकमै रोकिएका छन् ।

नारायणगढबाट मुग्लिनतर्फ जाँदै गरेको यूपी १७ एटी ८६२७ नम्बर प्लेटको भारतीय ग्यास बुलेटको अगाडिको भागमा आगलागी भएको प्रहरीले जनाएको छ । आगो दिउँसो साढे १ बजे नियन्त्रणमा आएको प्रहरीले जनाएको छ ।

आगलागीबाट कति क्षति भयो भन्नेबारे यकिन भएको छैन । घटनास्थलमा अहिले प्रहरी टोली पुगेको छ । यद्यपि साँझसम्म सडक पुन: सञ्चालनमा ल्याउने प्रहरीले जनाएको छ ।

बिजुलीको पोलमा ठोक्किएर ग्यास बुलेटमा आगो लागेको एसपी राठौरले जानकारी दिए ।