अपाङ्गता दिवसमा सगोल कास्कीद्वारा छात्रबृत्ति र सहयोग सामाग्री प्रदान

पोखरा, अन्र्तराष्ट्रिय अपाङ्गता दिवसको अवसरमा कास्कीको रुपा गाउँपालिकामा छात्रबृत्ति र सहयोगी सामाग्री वितरण गरिएको छ । पोखरा १५ नयाँगाउँमा रहेको संस्था सगोल कास्कीले दिवसकै अवसर पारेर अपाङ्गता भएका विद्यार्थीलाई छात्रबृत्ति प्रदान गरेको हो ।

अपाङ्गता भएका १६ जना छात्रा र १४ जना छात्र गरी ३० जनाका लागि झोला, कापी, कलम, विद्यालय पोशाक र फेस मास्क सहयोग प्रदान गरिएको सगोल कास्कीका सिबिआर अधिकृत बिमला केसीले जानकारी दिईन् । छात्रबृत्ति प्राप्त गरेका सबै विद्यार्थीलाई गाउँपालिकाको तर्फबाट पोशाक सिलाईका लागि रु पाँच सय प्रदान गरिएको छ ।

त्यस्तै अपाङ्गता भएका १५ जना नागरिकहरुका लागि आवस्यकता अनुसारका सहयोगी सामाग्री प्रदान गरिएको छ । अपाङ्गताको प्रकृति अनुसार ट्वाईलेट चियर, सेतोछडी, लठ्ठी, र बैसाखी प्रदान गरिएको उनले बताईन् ।

कार्यक्रममा बोल्दै प्रमुख अतिथि एवं रुपा गाउँपालिका अध्यक्ष नवराज ओझाले अपाङ्गता भएका व्यक्तिहरुलाई आर्थिक रुपमा सवल र आत्मनिर्भर बनाउन गाउँपालिकाले गरिरहेको प्रयासमा विभिन्न संघ संस्थाको पनि उत्तिकै सहयोग मिलेको बताए । उनले गाउँपालिकामै चिकित्सक खटाएर स्वास्थ्य परिक्षण गरी घरदैलोमै अपाङ्ता परिचयपत्र वितरण गरिएको भन्दै आगामी दिनमा पनि उनीहरुको हितका लागि काम गरिने बताए । “अहिले गाउँपालिकाले जे जती गरेको छ, यत्ति नै पर्याप्त होईन, अपाङ्गता भएकाहरुका लागि हामीले धेरै योजना बनाएका छौँ, उनले भने “बालबालिका विद्यालय पुगेपछि अपाङ्गतामैत्री वातावरण र संरचना अभाव देखिएका छन्, त्यस्ता संरचना निर्माणमा हामीले ध्यान दिईरहेका छौँ

कार्यक्रममा बोल्दै गाउँपालिकाकी उपप्रमुख लालसुवा गुरुङले अपाङ्गता भएका व्यक्तिहरुको लागि छुट्टै सहकारी स्थापना गरी आर्थिक उन्नती र विकाशमा ध्यान दिईएको बताईन् । “आर्थिक अवस्था सुधार भएमात्र अपाङ्गता भएका व्यक्तिहरु सक्षम हुन सक्छन्,” उनले भनिन्, “गाउँपालिकाले उनीहरुको अवस्था हेरेर आय आर्जनका लागि विभिन्न अवसरहरु दिईरहेको छ, यसमा विभिन्न दातृ संस्थाहरुले पनि सहयोग गरेका छन् ।

सो अवसरमा रुपा गाउँपालिकाका प्रमुख प्रसासकीय अधिकृत सन्तोष ढुङ्गानाले सार्वजनिक स्थलहरुको भौतिक पूर्वाधार निर्माणका क्रममा अपाङ्गमैत्री संरचना निर्माणमा गाउँपालिकाले जोड दिईरहेको बताए ।

रुपा अपाङ्गता संरक्षण समितिका अध्यक्ष सन्तबहादुर भुजेलको अध्यक्षतामा भएको कार्यक्रममा रुपा गाउँपालिका वडा नं ५ का वडा अध्यक्ष टेक बहादुर गुरुङ, गोनेसाका प्रज्वल पंगेनी, रुपा गाउँपालिका सामाजिक विकास शाखाका सिता सापकोटा सुवेदी, शिक्षा शाखा प्रमुख सन्दिप पौडेल लगायतले शुभकामना मन्तव्य व्यक्त गरे ।

कार्यक्रमलाई रुपा गाउँपालिका, सगोल कास्की र परिलक्षितले समेत सहयोग गरेका थिए भने सगोल कास्कीका सिबिआर अधिकृत बिमला केसीले कार्यक्रमको सञ्चालन गरेकी थिईन् ।