काठमाडौं, मुक्तिनाथ विकास बैंक लिमिटेडले जानकी फाइनान्स कम्पनी लिमिटेड र सिन्धु विकास बैंक लिमिटेडलाई प्राप्ति (एक्विजिशन) गर्ने भएको छ। यसका लागि तीनवटै संस्थाबीच प्रारम्भिक सम्झौता भएको छ।
मुक्तिनाथ विकास बैंकका अनुसार प्राप्ति प्रक्रियासम्बन्धी प्रारम्भिक सम्झौतापत्रमा तीनवटै संस्थाका प्रतिनिधिले हस्ताक्षर गरेका छन्। वित्तीय क्षेत्रलाई थप सुदृढ बनाउने, संस्थागत क्षमता अभिवृद्धि गर्ने, व्यवसाय विस्तार गर्ने तथा ग्राहकलाई थप प्रभावकारी वित्तीय सेवा उपलब्ध गराउने उद्देश्यले प्राप्ति प्रक्रिया अघि बढाइएको हो।
प्रारम्भिक सम्झौताअनुसार अब प्रस्तावित प्राप्तिसम्बन्धी विस्तृत अध्ययन तथा मूल्याङ्कनको प्रक्रिया अघि बढाइनेछ। त्यसक्रममा तीनवटै संस्थाको सम्पत्ति तथा दायित्वको यथार्थ परीक्षण, शेयर आदान–प्रदानसम्बन्धी व्यवस्था तथा अन्य आवश्यक प्रक्रिया पूरा गरिने बैंकले जनाएको छ।
यद्यपि, प्रारम्भिक सम्झौता हुँदैमा प्राप्ति प्रक्रिया अन्तिम रूपमा टुंगिएको भने छैन। नेपाल राष्ट्र बैंक तथा प्रचलित कानुनअनुसार आवश्यक स्वीकृति र नियामकीय प्रक्रिया पूरा भएपछि मात्रै प्राप्ति कार्यान्वयनमा आउनेछ।
तीनवटै संस्थाले प्रस्तावित प्राप्ति प्रक्रियालाई पारदर्शी र व्यवस्थित रूपमा अघि बढाउने प्रतिबद्धता जनाएका छन्। साथै, प्रचलित कानुनी तथा नियामकीय व्यवस्थाको पालना गर्दै सम्बन्धित सबै सरोकारवालाको हितलाई प्राथमिकतामा राख्ने जनाइएको छ।
मुक्तिनाथ विकास बैंकले पछिल्लो समय वित्तीय संस्थाहरूबीचको एकीकरण तथा विस्तारलाई प्राथमिकता दिँदै आएको अवस्थामा जानकी फाइनान्स र सिन्धु विकास बैंकलाई प्राप्ति गर्ने प्रस्तावलाई बैंकको व्यवसाय विस्तार तथा संस्थागत क्षमता सुदृढीकरणको महत्वपूर्ण कदमका रूपमा हेरिएको छ।
