पोखरा, पोखराको न्युरोडबाट करिब डेढ दशक अगाडी सेवा शुरु गरेको युनाइटेड रेफरेन्स ल्याबोरेटरी प्रालि (युआरएल) युआरएल ग्रुपमा परिबर्तन भएको छ। युआरएलको विशेष साधारणसभा तथा अधिवेशनले यसका २१ शाखालाई युआरएल ग्रुपमा रुपान्तरण गर्दै नयाँ नेतृत्व समेत चुनेको हो ।
अधिवेशनले ठाकुरप्रसाद पन्थको अध्यक्ष रहेको सात सदस्यीय नयाँ सञ्चालक समिति निर्वाचित गरेको छ । ग्रुपको सचिव एवम् प्रबन्ध निर्देशकमा गणेशप्रसाद कोइराला र बोर्ड डाइरेक्टरहरुमा बालकृष्ण शर्मा, गीता कार्की पन्थ, डा कृष्णराज अधिकारी, डा वसन्त पगेनी र पुष्पराज कोइराला छन् ।
साधारणसभाले संस्था सञ्चालनको नयाँ कार्यविधि पारित गर्नुका साथै तीन उपसमिति बनाउने निर्णय पनि गरेको छ । युआरएलमा अब लेखा तथा खरिद उपसमिति, व्यापार प्रबर्द्दन उपसमिति र गुणस्तर नियन्त्रण उपसमिति बन्ने छन् । युआरएल ग्रुपका अध्यक्ष पन्थले गण्डकीकै पहिलो रेफरेन्स ल्याब युआरएललाई थप सशक्त तवरले अघि बढाइने बताए ।
‘काठमाडौं बाहिरको पहिलो रेफरेन्स ल्याब युआरएलले ग्रुप अन्तर्गत २१ शाखा र तीन ब्रान्ड नाम सहित २४ स्थानबाट सेवा दिइरहेको उनले बताए पन्थले गुरुकुल खबरलाई दिएको जानकारी अनुसार ग्रुपले सम्भव भएसम्म छिटो कम्प्लिट डायग्नोस्टिक सेन्टर बनाउने योजना अगाडी सारेको छ ।
कार्यक्रममा प्रबन्ध निर्देशक कोइरालाले नयाँ प्रविधि, दक्ष जनशक्ति र सर्वसाधारणको आवश्यकता बमोजिमको सेवा प्रदान गरी युआरएलले अझ सशक्त तवरले सेवा प्रवाह गर्ने बताए।
युआरएल ग्रुपमा अहिले ५१ सेयर सदस्य छन् । ६० प्रतिशतभन्दा बढी आफैं आउने अर्थात् वाकिङ प्यासेन्ट भएको युआरएलमा अहिले प्राविधिक र गैरप्राविधिक गरी १ सय ५० भन्दा बढी कर्मचारी छन् । युआरएलले २०७२ सालबाट विभिन्न रोगका विशेषज्ञको सचेतनासहितको निशुल्क शिविर गर्दै आएको छ ।
