पोखरा, गण्डकी प्रदेशका बिभिन्न जिल्लामा कुरियर व्यवसाय संचालन गर्दै आएका कुरियर ब्यबसायीहरुको संस्था नेपाल कुरियर सेवा संघ गण्डकी प्रदेशको  प्रादेशिक एबम जिल्ला सम्मेलन पोखरामा सम्पन्न भयो । पोखरा सहित गण्डकी प्रदेश र र केहि केन्द्रीय पदाधिकारी र अतिथिसहित २ सय ५५ कुरियर ब्यबसायीहरुको सम्मेलनमा सहभागिता रहेको थियो ।

उक्त सम्मेलनले प्रदेशभित्र रहेका सम्पूर्ण जिल्लाका कुरियर व्यवसायीहरूलाई एकै ठाउँमा ल्याएर व्यवसायिक एकरूपता, सेवाको गुणस्तरमा वृद्धि, प्रविधिमैत्री सेवा र कुरियर ब्यबसायको दिर्घकालिन मार्गचित्र तय गर्दै कुरियर ब्यबसायलाई सेवा अझ भरपदों, छरितो र सुरक्षित बनाउनुपर्ने कुरामा जोड दिएको छ ।

सम्मेलनको उद्घाटन समारोहमा बोल्दै कार्यक्रमका प्रमुख अतिथि समेत रहेका नेपाल कुरियर सेवा संघका केन्द्रीय अध्यक्ष अनिलराज भण्डारीले कुरियर व्यवसायमा भोग्नुपरेका समस्या समाधान गर्न सरकारले समेत सहयोग गर्नुपर्ने खाँचो औंल्याए ।

उनले मध्यपुर्वमा केहि समयदेखि उत्पन्न द्वन्दका कारण काठमाडौँबाट बिभिन्न मुलुकमा पार्सल पठाउन कठिनाई भैरहेको भन्दै ब्यबसायीहरु बिचको अस्वस्थ्य प्रतिष्पर्धा, ईकमर्स ब्यबसायको रुपमा यसलाई विकास गर्न नसक्नु र डेलिभरी सेवामा बिधमान कठिनाईको कारण कुरियर ब्यबसाय पनि चुनौतीपूर्ण बन्दै गएको चर्चा गरे ।

नेपाल कुरियर सेवा संघका निवर्तमान केन्द्रीय अध्यक्ष दुर्गाप्रसाद सुवेदीले सम्मेलनले केन्द्र, प्रदेश र जिल्लास्तरमा भोग्नुपरेका बिभिन्न समस्या र कठिनाइ एबम समस्या र चुनौतीलाई सम्बोधन गर्न सहज हुने विश्वास व्यक्त गरे ।

कार्यक्रममा नेपाल कुरियर सेवा संघका पुर्व केन्द्रीय अध्यक्ष निर्मल खतिवडा र अर्का पुर्वअध्यक्ष देवेन्द्र खड्काले पनि कुरियर ब्यबसायीहरुले भोग्नुपरेका समस्याको बारेमा चर्चा गरेका थिए ।

सम्मेलनको उद्घाटन समारोहको अध्यक्षता गरेका नेपाल कुरियर सेवा संघ गण्डकी प्रदेशका अध्यक्ष रामु पौडेलले संस्थालाई बलियो बनाउन केन्द्र र प्रदेश समितिहरुको बिचमा आपसी समन्वय र सहकार्य हुनुपर्नेमा जोड दिंदै केन्द्रले तय गरेका नीति, योजना र मार्गदर्शनलाई प्रदेशस्तरमा प्रभावकारी रूपमा कार्यान्वयन गर्न आँफुहरु तयार रहेको जानकारी गराए ।

उनले केन्द्र र प्रदेशबीचको यो समन्वयले मात्र हाम्रो संगठनलाई दिगो र प्रभावकारी बनाउने बिश्वास व्यक्त गर्दै सम्मेलनले जिल्लास्तरका समस्या, चुनौती र सम्भावनाहरूलाई पनि उजागर गरेको बताए ।

सम्मेलनमा नेपाल कुरियर सेवा संघका उपाध्यक्ष तिलराज खतिवडाले अन्तराष्ट्रिय कुरियर व्यवसायीहरुले त्रिभुवन अन्तर्राष्ट्रिय विमानस्थलमा व्यहोर्नुपरेको भन्सार जटिलता र चुनौतीको बारेमा भनाई राखेका थिए ।

• तस्बिर – तिर्थ केसी / गुरुकुल खबर